Նահանջը շարունակվում է
Ֆուտբոլային ասոցիացիաների միջազգային միությունը (ՖԻՖԱ) երեկ հրապարակեց ազգային հավաքականների վարկանիշային դասակարգման նոյեմբեր ամսվա ցուցակը, որում Հայաստանի ազգային հավաքականը նախորդ ամսվա համեմատությամբ նահանջել է ինն աստիճանով եւ այժմ զբաղեցնում է 110-րդ հորիզոնականը:
Առաջին տասնյակում նոր հավաքականների անուններ չկան: Պարզապես, եղածներից մի քանիսը տեղերը փոխել են: Եվ այսպես, աշխարհի տասը լավագույն ազգային հավաքականներն են: Փակագծերում նշված է, թե որ թիմն ինչ տեղաշարժ է արձանագրել:
1. Իսպանիա (0)
2. Գերմանիա (+1)
3. Իտալիա (-1)
4. Հոլանդիա (+1)
5. Բրազիլիա (-1)
6. Արգենտինա (+1)
7. Խորվաթիա (-1)
8. Ռուսաստան (+1)
9. Չեխիա (-1)
10. Պորտուգալիա (0)
Ֆուտբոլի աշխարհի 2012 թվականի առաջնության խմբային մրցաշարում Հայաստանի մրցակից մյուս հավաքականները զբաղեցնում են այսպիսի դիրքեր: 13. Թուրքիա, 55. Բելգիա, 67. Բոսնիա եւ Հերցեգովինա, 131. Էստոնիա:
Առնվազն մեկ բրոնզե մեդալ
Լիվերպուլում շարունակվում է սիրողական բռնցքամարտի Եվրոպայի մեծահասակների առաջնությունը: Հայաստանի ազգային հավաքականը, որի գլխավոր մարզիչը Ռաֆայել Մեհրաբյանն է, առաջին օրերին բավականին կորուստներ տալուց հետո որոշակիորեն բարելավել է վիճակը: Մեր ընտրանին արդեն իր հաշվարկում առնվազն մեկ բրոնզե մեդալ ունի: 48 կիլոգրամ քաշային Հովհաննես Դանիելյանը, որը մեկնարկային տուրում ազատ էր, մուտքը մրցաշար տոնեց տանտերերից Դարրեն Լանգլեյի նկատմամբ միավորներով տարած համոզիչ հաղթանակով՝ 7:3 եւ մտավ կիսաեզրափակիչ՝ իր համար առնվազն Եվրոպայի առաջնության «բրոնզ» ապահովելով: Այժմ Հովհաննեսը կիսաեզրափակիչում ուժերը չափելու է Հունգարիայի ներկայացուցիչ Իշտվան Ունգվայի հետ:
Մեր մյուս երեք բռնցքամարտիկների՝ Էդուարդ Համբարձումյանի՝ 64 կգ, Անդրանիկ Հակոբյանի՝ 75 կգ եւ Ցոլակ Անանիկյանի՝ 91 կգ, հերթական մրցելույթների արդյունքների մասին առաջնության պաշտոնական կայքում երեկվա դրությամբ տեղեկություններ չկային:
Բախտամյանը կրկին երկրորդն է
Բանգկոկում անցկացված օդամղիչ ատրճանակով հրաձգության աշխարհի գավաթի խաղարկության եզրափակիչում Հայաստանը ներկայացնում էր Պեկինի օլիմպիական խաղերի մասնակից Նորայր Բախտամյանը: Նախնական փուլերում կրակագիծ ելած 200 նշանառուներից սկզբում պայքարը առաջին եզրափակիչում շարունակելու իրավունք ստացան 12 լավագույնները, որոնց մեջ էր նաեւ երեւանցին: Այստեղ նա ցույց տվեց լավագույն արդյունքը՝ 588 միավոր, եւ մտավ գլխավոր եզրափակիչ: Սակայն վճռորոշ պահին Նորայրն իր անվան դիմաց գրանցեց 97,2 միավոր՝ հաղթողի կոչումը զիջելով 102,4 միավոր վաստակած ուկրաինացի Ալեքսանդր Օմելչուկին:
Ութ հավաքականից թանկ ենք
Գերմանիայի «Տրանսֆեր Մարկետ» ընկերությունը, ուսումնասիրելով ֆուտբոլի Հայաստանի ազգային հավաքականի կազմում ընդգրկված ֆուտբոլիստների տրանսֆերային ընդհանուր արժեքը, եկել է հետեւության, որ այն 5,5 միլիոն եվրո է: Այս ցուցանիշով Հայաստանը ՈՒԵՖԱ-ի անդամ երկրների ցուցակում զբաղեցնում է 45-րդ տեղը՝ իրենից ետ թողնելով ութ ազգային հավաքականների:
«Տրանսֆեր Մարկետի» հավաստմամբ, ամենաթանկ հայ ֆուտբոլիստը Ռումինիայի «Տիմոշոարա» ակումբում խաղացող Արտավազդ Քարամյանն է՝ 1,8 մլն եվրո: Երկրորդը 600 հազար եվրո «արժեցող» Սամվել Մելքոնյանն է, իսկ երրորդ տեղը բաժանում են դարպասապահ Ռոման Բերեզովսկին եւ հարձակվող Էդգար Մանուչարյանը, յուրաքանչյուրը՝ 500 հազար եվրո: Եթե հավատալու լինենք ընկերությանը, աշխարհի ամենաթանկ հավաքականը Իսպանիայինն է՝ 419 մլն եվրո:
Առաջին անգամ
Սպորտային ըմբշամարտի միջազգային ֆեդերացիան (ՖԻԼԱ) պաշտոնական հրավեր է ուղարկել հունահռոմեական ըմբշամարտի աշխարհի ութ լավագույն թիմերին, որոնք եկող տարվա փետրվարի 20-21-ին պետք է վիճարկեն աշխարհի գավաթը: Հայաստանի հավաքականն առաջին անգամ է նման պատվի արժանանում: Մեր ընտրանու մրցակիցները լինելու են Ռուսաստանը, Ֆրանսիան, Չինաստանը, Կուբան, Ղազախստանը, Հունգարիան եւ Ադրբեջանը:
