![\"\"](\"https://www.aravot.am/2008/aravot_arm/November/6/p7.gif\")
«Ղարաբաղյան հակամարտության կարգավորման շուրջ գործընթացն այնքան է արագացել, որ ԱՄՆ նորընտիր նախագահ Բարաք Օբաման հնարավոր է չհասցնի դրանով զբաղվել»,- «Ա1+»-ի հետ զրույցում ասել է ՀՀ նախկին արտգործնախարար Վահան Փափազյանը: Ըստ նրա, շատ հավանական է, որ Բուշի վարչակազմը փորձի մինչեւ տարեվերջ հաջողության հասնել կարգավորման լուծման ուղղությամբ, եւ այսպես կոչված՝ շրջանակային համաձայնագիրը կնքվի մինչեւ Օբամայի՝ հունվարի կեսերին Սպիտակ տուն մտնելը: «Կարելի է, իհարկե, ակնկալել, որ Բարաք Օբաման ինչ-որ բան կփոխի, սակայն, չեմ բացառում, որ մինչեւ տարեվերջ լինեն այնպիսի զարգացումներ, որոնք վերջնականորեն ուրվագծեն հակամարտության լուծումը: Կարծում եմ, դեկտեմբերին փորձ կարվի կողմերին հրավիրել Վաշինգտոն եւ այնտեղ, գուցե նաեւ պարտադրանքի ճանապարհով, ստիպեն ստորագրել փաստաթուղթը»,- նկատել է Վ. Փափազյանը:
Դիվանագետի դիտարկմամբ, կողմերը կարող են խուսափել ստորագրումից՝ օգտագործելով միջնորդների միջեւ առկա հակասությունները: Սակայն եթե միջնորդները համաձայնեն սեղանին առկա փաստաթղթի հիմնարար սկզբունքների շուրջ, ապա ստիպված կլինեն ստորագրել:
