Ըստ թոշակառուի, նրա տան կեսն ուզում են խլել անկոչ տերերը
![\"\"](\"https://www.aravot.am/2008/aravot_arm/October/25/p10.gif\")
Տիկին Ասյան իրավիճակից ելք չի տեսնում:![\"\"](\"https://www.aravot.am/2008/aravot_arm/October/25/p12.gif\")
ԴԱՀԿ-ի ներկայացուցիչը ծեր կնոջը թողեց բաց երկնքի տակ:
ՀՀ սահմանադրության 8-րդ եւ 31-րդ հոդվածների խախտման կապակցությամբ ՀՀ նախագահ Սերժ Սարգսյանին եւ ԶԼՄ-ներին հայտարարությամբ երեկ դիմեց 82-ամյա Ասյա Սարգսյանը:
Ա. Սարգսյանի հայտարարության մեջ ասվում է. «50 տարի աշխատելով ՀԽՍՀ գերագույն դատարանի դատական գործերով քրեական կոլեգիայի պատասխանատու քարտուղար՝ չեմ հանդիպել այնպիսի աղաղակող կեղծիքի եւ Սահմանադրության ու օրենքների այնպիսի խախտման, ինչը կատարվեց եւ շարունակում է կատարվել 2002-ից մինչ օրս ինձ հետ: Նոտար Էմմա Շաբոյանի ձեռամբ, աղաղակող կեղծիքով Երեւանում գրանցում չունեցող Գեւորգ Դերմոյանը՝ 1971-ին, եւ Գեւորգ Հովսեփյանը՝ 1980-ին, տիրացել են իմ քրտինքով գնած Անտառային փողոցի թիվ 152 տան մի մասին»:
Ասյա Սարգսյանը հայտնում է, որ, լինելով հիվանդ որդու տեր եւ ունենալով ծանրաբեռնված ընտանիք, հոգեկան հիվանդությամբ տառապող թոռնիկ, անտեղյակ է եղել երկու Գեւորգների կեղծիքին: Նա «Առավոտի» հետ հեռախոսազրույցի ժամանակ ասաց. «Ամուսնուս՝ Հայրենական պատերազմի 2-րդ կարգի հաշմանդամ Աղասի Մանուկյանի հետ, տան կողքի ապառաժներից մատներով հող եմ պոկել՝ 800 քմ, եւ հանկարծ կեղծիքներով տան մի մասը գողացած Գ. Հովսեփյանը՝ Վրաստանի Նինոծմինդայի շրջանի Մալայա Գոնդուրա գյուղի բնակիչ, մի քանի անգամ Ռուսաստանում, Վրաստանում ամուսնացած, երբեք Հայաստանի քաղաքացի չհանդիսացած անձը, 2001թ. ներկայացել է իր հերթական կանանցից մեկի՝ Արփենիկ Սարգսյանի հետ եւ ինձ պահանջ ներկայացրել՝ նորից կիսել տան մի մասը եւ մեր հողից 480 քմ տալ իրեն»: Ասյա Սարգսյանը դատական ատյաններին ներկայացրել է գործող Սահմանադրության 8-րդ եւ 31-րդ հոդվածները՝ այն մասին, որ օտար երկրի քաղաքացին իրավունք չունի հող գնել եւ վաճառել, բայց, ինչպես շարունակում է բողոքի մեջ՝ «Ցավոք, հարցերը մեր երկրում լուծվում են ոչ թե Սահմանադրությամբ եւ օրենքով, այլ ամենազոր կաշառքով: Եվ այդ «ամենազորի» ուժով մեր «քաջարի, փառապանծ» օրենքի ներկայացուցիչները՝ հարկադիր կատարողներն այս տարվա օգոստոսի 26-ին եկան, քանդեցին իմ խրճիթ-կացարանը եւ 82-ամյա հաշմանդամ-անդամալույծիս թողեցին անծածկ, բաց երկնքի տակ»: Տիկին Սարգսյանը նշում է նաեւ. «Ես ուժ չունեմ շարժվելու, որպեսզի հասնեմ նախագահական նստավայր կամ իմ նախկին աշխատատեղը՝ Գերագույն դատարան՝ նստացույց ու հացադուլ հայտարարելու եւ այնտեղ մահկանացուս կնքելու, իսկ անթույլատրելի, աղաղակող անարդարությունների դեմ բողոքս այլ կերպ արտահայտել անկարող եմ»: ՀՀ նախագահից եւ ԶԼՄ-ներից տիկին Սարգսյանը խնդրում է հրատապ օգնություն եւ հարցի արդարացի լուծում:
