«Հարեյան publishing» լրատվական ընկերության ղեկավարի նկատառումները
«Ուրբաթ» ակումբի երեկվա հյուրը ԱՄՆ-ի «Հարեյան publishing» լրատվական ընկերության (կենտրոնակայանը՝ ԱՄՆ Հյուսիսային Կարոլինա նահանգում) տնօրեն Արմեն Հարեյանն էր, որն անդրադարձավ ինտերնետում քարոզչական պատերազմին:
Նա նշեց, որ նկատել է, թե արտասահմանցիները Հայաստանի մասին լուրեր ստանում են ինտերնետից, բայց երբ դրանք փնտրում ես, օրինակ՝ google-ի news համակարգում, պարզվում է, որ բոլոր լուրերը գալիս են ադրբեջանական եւ թուրքական աղբյուրներից. «Իսկ սա շատ վտանգավոր է, որովհետեւ օտարը մեզ ճանաչում, մեր մասին պատկերացում է կազմում ադրբեջանական կամ թուրքական աղբյուրներով, իսկ նրանք հաստատ մեր մասին լավ բաներ չեն ասի: Այստեղ՝ Հայաստանում, այն, ինչ պահանջվում է անել՝ լրատվական պատերազմում հաղթելու համար, դուք անում եք, ուղղակի այստեղ գրված լուրերը, նույնիսկ անգլերեն թարգմանվողները, չեն հասնում օտար լրագրողներին… այդ լուրերը google-ի համակարգը չի ճանաչում»: Ըստ Հարեյանի, անհրաժեշտ է, որ թերթերի օտար լեզվով բաժինը դիմի, օրինակ, google news-ի որոնման համակարգերին, որպեսզի դրանք ավտոմատ կերպով գան լուրերը վերցնեն ու անընդհատ թարմացնեն. «Դրա համար կան մի քանի պայմաններ, որոնք որեւէ դրամական ներդրում չեն պահանջում: Օրինակ, մեր թերթերը պետք է google-ին տեղեկացնեն, որ Հայաստանում կան կոնկրետ թերթեր, որոնք լույս են տեսնում նաեւ անգլերեն: Կամ, երբ հապավումներով ենք գրում, ասենք՝ Հայաստանի Հանրապետությունը դարձնում ենք ՀՀ, ու տվյալ հոդվածը թարգմանվում է անգլերեն, ՀՀ-ն դառնում է RA, բայց google-ն ի՞նչ իմանա, որ այդ RA-ը նշանակում է REPUBLIC of ARMENIA: Եվ երբ google-ի մեջ որոնում ենք ARMENIA ու գրում ենք news-ի բաժինը, մեր հոդվածները, որոնք այդ համակարգում կան, չեն երեւում, որովհետեւ google-ը RA-ը չի ճանաչում: Ավելին, անգլերենում երբ գրում են RA, նկատի ունեն ռեւմատիզմ հիվանդությունը, որն էլ մեզ հետ կապ չունի»: Ա. Հարեյանի համոզմամբ, Ադրբեջանում հատուկ կազմակերպություններ ու կենտրոններ կան, որոնք զբաղվում են լրատվական պատերազմով. «Նրանք միշտ հարձակվողի դերում են: Այնպես են անում, որ իրենց լուրերը՝ մեր մասին՝ միշտ լինեն ամենաառաջին տեղերում: Այս ամենը, կարելի է հեշտությամբ շտկել, պարզապես պետք է հասկանանք, թե google-ն ու մյուս որոնման համակարգերն ինչպես են աշխատում: Այն հոդվածները, որոնք տեղադրվում են վեբ-կայքերում, պետք է օպտիմալացնել որոնման համակարգերի համար»: Ա. Հարեյանն ասաց, որ եթե ինքը լիներ որեւէ հայաստանյան թերթի կամ լրատվական ընկերության ղեկավար, շահագրգիռ կլիներ, որ իր թերթում տպագրվածը ինչքան հնարավոր է լայն լսարան ընդգրկի. «Թերթի խմբագիրները պետք է իրենց լուրերը անմիջապես տեղավորեն բոլոր որոնման համակարգերի լուրերի բաժնում: Պատկերացրեք՝ մեզ համար ինչքան շահեկան կլիներ, երբ ինչ-որ մեկը ցանկանար, ասենք՝ Ադրբեջանի մասին լուրեր փնտրել, ու դրանք բացվեին հայկական աղբյուրներից: Շատ լավ կլիներ նաեւ, որ ստեղծվեր մի կենտրոն, որը, հանուն մեր հայկական շահի, աշխատեր այս ամենի վրա»:
