ՄԱՐԶԱԿԱՆ ԽՃԱՆԿԱՐ

Անդրե Աղասին՝ սպորտի մեծագույն լեգենդ

Նյու Յորքի «Ուոլդորֆ-Ասթորիա» հյուրանոցում, ի պատիվ 2008 թվականին «Սպորտի մեծագույն լեգենդներ» տիտղոսին արժանացած մարզիկների, կազմակերպվել էր թվով 23-րդ հանդիսավոր ճաշկերույթը:

Այս տարի արարողության կազմակերպիչը «Բուոնիկոնտի հիմնադրամ» ոչ առեւտրային կազմակերպությունն էր, որը ֆինանսավորում է ողնուղեղի ուսումնասիրման՝ աշխարհում խոշորագույն կենտրոնը, որի անցկացված հարցման արդյունքներով 2008 թվականին «Սպորտի մեծագույն լեգենդ» կոչմանն արժանացել են.

Անդրե Աղասի. պրոֆեսիոնալ թենիսիստ, աշխարհի նախկին թիվ մեկ ռակետ: Նա ութ անգամ հաղթել է «Մեծ սաղավարտի» մրցաշարերում եւ անհատապես նվաճել օլիմպիական խաղերի չեմպիոնի կոչումը:

Ջերրի Ռայս. վիճակագրությամբ ամերիկյան ֆուտբոլի բոլոր ժամանակների առաջատար: NFL-ում անցկացրել է 20 մրցաշրջան, որից 13-ում ընդգրկվել լավագույն խաղացողների ցուցակում:

Սքոթի Պիպեն. «NBA All star»-ի յոթնյակի մասնակից: Տեղ է գտել պատմության մեջ լավագույն 50 բասկետբոլիստների ցուցակում:

Հելիո Կաստրոնեւեշ. Հյուսիսային Ամերիկայի ավտոարշավորդների առաջատար:

«Զակումին» ընտրվեց աշխարհի առաջնության խորհրդանիշ

Հարավ-աֆրիկյան Հանրապետության մայրաքաղաք Յոհաննեսբուրգում օրերս կայացավ ֆուտբոլի Աշխարհի գավաթի խաղարկության եզրափակիչի խորհրդանիշի՝ «Զակումի» հովազի շնորհանդեսը:

Նրա մորթու վրայի խալերը հնգանկյուն են եւ հիշեցնում են ֆուտբոլի գնդակի ավանդական ձեւավորումը: Հովազը խորհրդանշում է ինչպես Հարավ-աֆրիկյան հանրապետությունը, այնպես էլ ամբողջ Աֆրիկա մայրցամաքը: Նա ինքնավստահ է, հպարտ, հյուրասեր, անմիջական ու նախաձեռնող: Նա՝ որպես ՀԱՀ-ի հպարտ բնակիչ, սիրում է ֆուտբոլը, որը միավորում է մարդկանց եւ օգնում հաղթահարել լեզվական արգելքները, ֆուտբոլասերների մեջ լավ տրամադրություն ստեղծում:

«Ֆորմուլա 1»-ի հարուստները

«Formula Money» հանդեսի հաշվարկներով, «Toyota»-ն ժամանակակից պելետոնում ամենամեծ բյուջեն ունի:

Այս ցուցանիշով Ճապոնիան գերազանցում է մարզաձեւի ճանաչված առաջատարներ «McLaren»-ին եւ «Ferrari»-ին, սակայն ցուցանիշների վերահաշվարկումով՝ ներդրումների դիմաց մեծ փոխհատուցումներ առայժմ չունի:

Եթե բոլոր թիմերի բյուջեները գումարենք, կստանանք մեկ մրցաշրջանում ծախսվող $3 միլիարդից ավելի գումար: Դրա մեջ մտնում են թե հովանավորչական, թե մրցանակային գումարները, թե այլ ծախսեր: Դրա համար է, որ մարզաձեւի միջազգային ֆեդերացիան (FIA) ներկայումս լուրջ ջանքեր է գործադրում «Formula 1»-ի հսկայական ծախսերը կրճատելու համար, որն ընդհանուր առմամբ կազմում է $3 միլիարդ 027.85 միլիոն: Այդ գումարը 2008 թվականին թիմերի վրա բաշխվել է հետեւյալ չափաբաժիններով (միլիոն դոլար):

Toyota 445,6

McLaren 433,3

Ferrari 414,9

Honda 398,1

Renault 393,8

BMW Sauber 366,8

Red Bull 164,7

Williams 160,6

Toro Rosso 128,2

Force India 121,85