![\"\"](\"https://www.aravot.am/2008/aravot_arm/September/18/p3.jpg\")
Ստամբուլում լույս տեսնող «Ժամանակ» թերթի գլխավոր խմբագիր Արա Գոչունյանի հավաստմամբ՝ իրենք այս սկզբունքով են խոսում
Հայոց ցեղասպանության մասին:
Երեկ «Ուրբաթ» ակումբի հյուրն էր Ստամբուլում 1908թ. հոկտեմբերի 28-ից լույս տեսնող 100-ամյա «Ժամանակ» օրաթերթի գլխավոր խմբագիր Արա Գոչունյանը: Նրա հավաստմամբ՝ իրենք Թուրքիայում ազատ թերթ են հրատարակում, ազատ՝ այն առումով, որ որեւէ կուսակցության այն չի պատկանում: «Առավոտը» պարոն Գոչունյանից հետաքրքրվեց, թե ազատ թերթ հրատարակելով՝ խմբագիրը կամ լրագրողները ճնշումների չե՞ն ենթարկվում Թուրքիայի իշխանությունների կողմից: «Փառք Աստծո, 20 միլիոնանոց Ստամբուլում գրաքննության եւ վերահսկողության մթնոլորտ չկա»,- հնչեց պատասխանը: Լրագրողները Ա. Գոչունյանից հետաքրքրվեցին, թե ինչպե՞ս է գնահատում ՀՀ-ի եւ Թուրքիայի նախագահների հայտնի հանդիպումը: «Հայ-թուրքական հարաբերությունները երկար ժամանակ մսխված էին, ուստի ժամանակն է ինչ-որ չափով հավասարակշռել դրանք: Չպիտի շատ շտապել եւ պիտի հաշվի առնել տարածաշրջանային նոր իրադրությունը»,- պատասխանեց խմբագիրը: Հայաստան այցից հետո թուրք լրագրողների լուսաբանումների մասին Ա. Գոչունյանն ասաց. «Թուրքական ԶԼՄ-ներն ակտիվ աշխատեցին, այցին նախորդող փուլերում էլ մեր միջոցով փորձում էին իմանալ Հայաստանի աշխատանքային պայմանները: Բոլորին ասում էինք, որ դրանք համապատասխանում են միջազգային չափանիշներին: Իսկ լուսաբանումները բավականին դրական էին»:
Մի լրագրողի հետաքրքրեց, թե «Ժամանակը» ցեղասպանությունը կոչո՞ւմ է իր անունով, թե՞ չի օգտագործում այդ տերմինը: «Մենք մանրամասն լուսաբանում ենք թեման, քանի որ Թուրքիայում էլ այն բավականին հրատապ է: Այս դեպքում երկու կողմի զգայնությունները չեն համընկնում, եւ տողատակերով ասվածները մարդիկ դժվարանում են հասկանալ, ուստի երկու կողմի կարծիքներն էլ փորձում ենք արտահայտել,- ասաց Ա. Գոչունյանը եւ շարունակեց,- երբեք իրադարձությունները թաքցնել կամ գիտակցված աղավաղել չի կարելի: Բայց այդ թեմայի լուսաբանման դեպքում փորձում ենք մեր ծագումը եւ քաղաքացիական պատասխանատվությունները իրար չհակադրել»:
Լրագրողներից մեկի դիտարկմամբ՝ ստամբուլահայ երիտասարդներն ավելի շատ թուրքալեզու «Ակոս» են կարդում, քան հայալեզու մամուլ: Նույն լրագրողը հետաքրքրվեց, թե դա չի՞ նշանակում, որ Ստամբուլում հայալեզու պարբերականները հոգեվարք են ապրում: «Երիտասարդ ընթերցողներ ունենք, իսկ լեզվի հետ կապված դժվարությունները Սփյուռքի պարագայում տարածված են: Այն, որ տեղի լեզվով պարբերականներն ավելի են ընթերցվում, քան հայերենները, բնորոշ է բոլոր երկրներին: Սփյուռքահայ մամուլն ինքնին զգայնության խորհրդանիշ է. մեր առաքելությունը Սյփուռքում ապրող մարդկանց մոտ՝ իրենց մայրենիով հաղորդակցվելու մղում առաջացնելն է: Նույնիսկ մեր մամուլի հրապարակումները փորձում են ուսուցիչները դասի առարկա դարձնել»,- հնչեց պատասխանը: Իսկ այն մասին, որ ադրբեջանական day.az էլեկտրոնային լրատվամիջոցը գրել էր, թե Գյուլի եւ Սերժ Սարգսյանի հանդիպման ժամանակ խոսվել է ազատագրված տարածքները վերադարձնելու մասին, Ա. Գոչունյանն ասաց. «Երբ Գյուլը գալիս էր Հայաստան, ինքնաթիռում լրագրողները հարցնում էին այդ այցի ռիսկերի մասին: Նա ասաց, որ Հայաստան չի գնում որեւէ առաջարկություն ներկայացնելու կամ ինչ-որ փաստաթղթի, պայմանավորվածության համար, այլ Հայաստանի նախագահի հետ կարծիքներ պիտի փոխանակեն, թե հարեւանները տարածաշրջանի առկա իրադրությունում ինչպես են պատկերացնում իրենց կապերը»:
