![\"\"](\"https://www.aravot.am/2008/aravot_arm/September/11/p7.jpg\")
Երեկ, երբ առաջին թեթեւագույն քաշային կարգում IBF-ի եւ IBO-ի վարկածներով աշխարհի չեմպիոն Վիկ Դարչինյանի հետ պատրաստվում էինք մեկնել Սպիտակ՝ նրա անվամբ կոչված բռնցքամարտի ակումբի բացմանը ներկա լինելու, Վախթանգի մենեջեր Էլաես Նասան զանգահարեց եւ տեղեկացրեց, որ WBC-ի եւ WBA-ի վարկածներով աշխարհի չեմպիոն Քրիստիան Միխարեսի հետ գոտիների միավորման մենամարտի պայմանագիրն արդեն ստորագրվել է: Այն կայանալու է նախապես հայտարարված ժամկետից մեկ շաբաթ շուտ՝ նոյեմբերի 1-ին: Բնական է՝ հենց տեղում Վիկի հետ հանպատրաստից հարցազրույց անցկացրինք:
– Մենամարտի օրն ինչո՞ւ փոխվեց:
– Պրոֆեսիոնալ բռնցքամարտում շատ բան կախված է հեռուստաընկերություններից: Առավոտյան տեղեկացա, որ «Showtime»-ն առաջարկել է այդ օրը: Ու պայմանագիրը ստորագրվեց:
– Հիմա ծրագրերդ փոխվեցի՞ն:
– Այո: Մեկ շաբաթն էլ մեծ նշանակություն ունի: Արդեն ամեն բան թողնելու եմ ու սկսելու եմ նախապատրաստվել:
– Մեկ ամիս է, ինչ Հայաստանում ես, այս ընթացքում մարզվե՞լ ես:
– Փորձել եմ, բայց չի ստացվել: Կնոջս ու որդուս հետ եմ այստեղ: Անընդհատ հանդիպումներ հարազատների, բարեկամների, ընկերների հետ, հրավերներ: Հնարավոր չէր: Բայց նոյեմբերի 1-ին դեռ յոթ շաբաթ կա:
– Որոշե՞լ ես անելիքդ:
– Ուրբաթ գիշեր մեկնում եմ Ավստրալիա ու անմիջապես ձեռնամուխ եմ լինելու մարզումներին: Լաս Վեգասում կլինեմ մարտից մոտ 20 օր առաջ, որպեսզի հարմարվեմ ժամային գոտուն, կլիմային: Վանաձորից կգա նաեւ իմ անձնական մարզիչ Վազգեն Բադալյանը:
– Այդ մարտում հաղթողը կրելու է չորս գոտի՝ դառնալով ձեր քաշային կարգում բացարձակ չեմպիո՞ն:
– Այո: Դա լինելու է իմ մարզական կարիերայի ամենակարեւոր մենամարտը ու երազանքս իրականացնելու եզակի հնարավորություն է: Դրա համար էլ շատ լուրջ եմ մոտենալու: Կարելի է ասել, որ դա նաեւ պատմական մենամարտ կլինի, քանի որ այս քաշային կարգում պատմության մեջ բացարձակ չեմպիոն չի եղել: Այդ կոչումն առաջինը ես կկրեմ:
– Բայց Միխարեսն աշխարհում համարվում է առաջինը:
– Հուսով եմ՝ դա կտեւի մինչեւ նոյեմբերի 1-ը:
– Նրա մարտաոճն ուսումնասիրե՞լ ես:
– Անպայման: Ուժեղ մրցակից է: Մեր ոճերը մոտավորապես նույնն են՝ հարձակողական: Բայց ես Միխարեսին անակնկալներ կմատուցեմ:
– Մենամարտը որտե՞ղ է լինելու:
– Լաս Վեգասի «MGM Cazino»-ում, որը Քըրք Քրքորյանինն է:
– Դրանից հետո ի՞նչ է լինելու:
– Հաջորդը լինելու է Նոնիտո Դոնեյրը: Այս անգամ արդեն նա ինձնից փախչել չի կարողանա:
