Արդարադատության նախարարության քրեակատարողական հիմնարկների վարչության կողմից լրատվամիջոցներին տրամադրած տրանսպորտային միջոցի անսարքության պատճառով՝ «Աբովյան» քրեակատարողական հիմնարկում նշանակված «Էկոլոգիայի, տնտեսագիտության եւ իրավունքի համալսարանի» ընդունելության քննությունը սկսվեց 1,5 ժամ ուշացումով:
Ուշացմանը նպաստեցին նաեւ հեռուստաընկերությունները, որոնք, առաջին անգամ լինելով ազատազրկման վայրում, փորձում էին նախատեսված միջոցառման շրջանակից դուրս գալ:
Ինչեւէ, կարողացանք հայտնվել մի «լսարանում», ուր լրագրողների եւ օպերատորների աղմուկի տակ թափանցիկ քննություններ էին հանձնում երկու անչափահաս դատապարտյալներ՝ Դավիթ Ծատուրյանն ու Դավիթ Առաքելյանը։ Նրանց ուսումը լինելու է վճարովի, կսովորեն հեռակա կարգով: Տարեկան Միացյալ Նահանգների 600 դոլարին համարժեք գումարը կվճարեն դատապարտյալների ծնողները:
Ի դեպ, Դավիթ Ծատուրյանը հայերեն միասնական քննությունների ժամանակ ստացել է 19 միավոր:
Տեղեկացնենք, որ «Նուբարաշեն» քրեակատարողական հիմնարկի ցմահ ազատազրկման դատապարտված Արսեն Արծրունին հայ առաջին դատապարտյալն էր, որը սկսեց ուսանել մասնավոր բուհում:
