![\"\"](\"https://www.aravot.am/2008/aravot_arm/August/28/p5.jpg\")
«Ա1+»-ի հարցազրույցը Արաբկիրի թաղապետ Հովհաննես Շահինյանի հետ
– Պարոն Շահինյան, ինչո՞ւ եք կրկին առաջադրել Ձեր թեկնածությունը:
– Չնայած Երեւան քաղաքի թաղային համայնքների ընտրությունները մեկ տարի են ընդգրկում, քանի որ առաջիկայում մենք ընդունելու ենք «Երեւանի մասին» օրենք եւ 2009թ.-ին պետք է պատրաստվել Երեւանի ավագանու ընտրություններին, սակայն եթե նույնիսկ մեկ օրով էլ լիներ ընտրությունները, ես կառաջադրվեի՝ իմ համայնքին ծառայելու համար:
– Ձեր նախորդ ծրագիրը որքանո՞վ եք կարողացել իրականացնել:
– 3 տարի առաջ իմ կարգախոսն էր՝ «Առաջընթաց Արաբկիրում»: Կարծում եմ, որ սեպտեմբերի 7-ին իրենց ընտրություն կատարելու ընթացքում արաբկիրցիները կասեն՝ տեսնո՞ւմ են այդ առաջընթացը, թե՞ ոչ: Այսօր իմ կարգախոսն է. «Մենք խոսում ենք փաստերով: Մենք գործում ենք ծրագրերով»: Ամենօրյա մեր աշխատանքի հաշվետվությունը մենք ներկայացրել ենք թե հասցեներով, թե տարեթվերով, թե ֆինանսներով: Մենք նախատեսում ենք, որ 2009-ին պետք է ավարտին հասցնենք նաեւ Արաբկիր համայնքի արտաքին լուսավորությունը, միջբակային հատվածների լուսավորությունը: Բավականին մեծ աշխատանքներ են տարվել բակերի վերանորոգման, Կոմիտասի փողոցի կանաչ գոտիների ոռոգման, հանգստի գոտիների ստեղծման հարցում: Արաբկիր համայնքն այսօր չունի ճանապարհների, տրասնսպորտի խնդիր: 2009-ին մենք աշխատելու ենք սպասարկման ոլորտի որակի բարձրացման վրա:
– Այսօր Արաբկիրը մաքրությամբ չի փայլում. բազմաթիվ արաբկիրցիներ դժգոհում են աղբահանությունից: Այս ուղղությամբ ի՞նչ եք նախատեսում անել:
– Այո, դա այդպես է: Պետք է ասեմ, որ 2005թ.-ից մեր տրամադրության տակ չի եղել գոնե մեկ միավոր մեքենա, մեխանիզացիա: Արաբկիրի մաքրության համար այսօր մեզ անհրաժեշտ է 100-120 մեխանիզացիա, իսկ մենք ունենք մոտ 50 մեքենա, եւ եւս 10-ը շուտով կավելանա: Այդ խմբաքանակը ձեռք բերելուց արդեն մեկ ամիս հետո արաբկիրցիները փոփոխությունը կզգան: 2009թ. մենք նաեւ մասնավոր սեկտորի համար պատրաստվում ենք ժամանակակից աղբամաններ ներմուծել՝ բակերում տեղադրելու համար:
– Զոյա Թադեւոսյանին պաշտպանում է Հայ Ազգային կոնգրեսը, իսկ Ալբերտ Երիցյանին, թեեւ պաշտոնական հայտարարություն չի եղել, սակայն պաշտպանում են իշխանությունները, իսկ Ձեզ ո՞վ է աջակցում:
– Ես չեմ կարեւորում, թե ով ում է պաշտպանում: Ինձ համար թաղապետի պայքարը ծրագրային է եւ ոչ թե քաղաքական: Ես բազմիցս նշել եմ, որ Արաբկիրի համայնքի ղեկավարն եմ եւ անդամակցում եմ ՀՀԿ-ին: Գիտեք, դուք կարող եք լինել լավ կուսակցական եւ վատ մենեջեր եւ հակառակը:
– ՀՀԿ անդամ լինելը Ձեզ այս ընտրություններում կխանգարի՞, թե՞ կօգնի:
– Ես նախ ուզում եմ ասել, որ սխալվելու են բոլոր նրանք, ովքեր կարծում են, որ Արաբկիրում կարող են ձայներ գնել: Արաբկիրը մաքուր է այդ առումով, եւ Արաբկիրում ձայներ չեն վաճառում: Վստահ եմ, որ արաբկիրցիներն իրենց երեխաների ապագան որեւէ մեկին չեն վաճառի, դրանում բոլորը կհամոզվեն սեպտեմբերի 7-ին: Ինչ վերաբերում է կուսակցական պատկանելությանը, ապա պետք է ասեմ, որ մեր աշխատանքը թիմային է: Ինձ օգնում է այն, որ ես շատ ընկերներ ունեմ, եւ իմ կուսակցությունը, իշխանություն լինելով, նպաստում է շատ խնդիրների շուտափույթ լուծմանը:
– Իսկ եթե կան ընտրողներ, որոնք գոհ են Ձեր աշխատանքից եւ դժգոհ են Ձեր կուսակցությունից, այս դեպքում Դուք ձայներ չե՞ք կորցնում:
– Այդ ընտրողները պետք է հասկանան, որ թաղապետի ընտրություններում կուսակցական պատկանելությունն առաջնային չէ: Պետք է նայել նաեւ կատարված աշխատանքին եւ առաջիկա ծրագրերին: Օրինակ՝ ես ծանոթ եմ Զոյա Թադեւոսյանի հրապարակային գործունեությանը, որը վատը չէ, սակայն չեմ պատկերացնում, կասկածներ ունեմ, որ տեղական ինքնակառավարման ոլորտում նա նույնպես կարող է նման կերպ աշխատել: Ես չեմ պատկերացնում, թե այս ոլորտի մեջ փորձ չունեցող մարդիկ ինչպես պետք է գան եւ մեկ տարվա ընթացքում 0-ից ինչ-որ բան սկսեն:
– Դուք նշում եք Զոյա Թադեւոսյանի մասին, մինչդեռ մամուլում բազմաթիվ հրապարակումներ են եղել, որ իշխանություններն ամեն ինչ անելու են, որպեսզի Արաբկիրի թաղապետ դառնա Ալբերտ Երիցյանը:
– Ես միայն կարող եմ ասել, որ 15 տարվա մեջ ես կարող էի խանութ ունենալ եւ տնտեսական գործունեություն վարել, սակայն չեմ արել, որովհետեւ վստահ էի, որ դա ինձ մոտ չէր ստացվի: Այսինքն՝ պետք է զբաղվել այն գործով, որտեղ կարող ես հաջողություն ունենալ:
– Ձեր կուսակցությունը Ձեզ պաշտպանելո՞ւ է թաղապետի ընտրություններում:
– Ես կարծում եմ՝ կարիք չկա, որ ՀՀԿ-ն պաշտոնապես հանդես գա հայտարարությամբ: Համայնքի ղեկավարի ընտրությունը քաղաքական ընտրություն չէ: ՀՀԿ-ի իմ գործընկերներն ինձ աջակցում եւ եւ դա բավարար է: Ինձ համար կարեւոր է արաբկիրցիների աջակցությունը, որը կա եւ որին սեպտեմբերի 7-ին բոլորը ականատես կլինեն:
– Ձեր 3 կարգախոսներից մեկը սա է՝ «Հաղթելու եմ»: Չե՞ք կարծում, որ սա հիշեցնում է Համաժողովրդական շարժման կարգախոսը՝ «Հաղթելու ենք» եւ իր ազդեցությունը կարող է ունենալ Ձեր ընտրություններում:
– Եթե որեւէ մեկը մասնակցում է ընտրության, ապա նա չպետք է մտածի պարտվելու մասին: «Հաղթելու եմ»՝ շատ տրամաբանական կարգախոս է:
