Հայ ազգային կոնգրեսը երեկ հանդես է եկել հայտարարությամբ՝ Հայաստանում սկսված վառելիքի ճգնաժամի կապակցությամբ, որում, մասնավորապես, ասված է. «Հանրապետությունում վերջին օրերին առկա է տնտեսական լուրջ ճգնաժամ: Ռազմավարական նշանակության ապրանք համարվող հեղուկ վառելիքի պաշարները գրեթե սպառված են, բենզալցակայանների մի մասը չի աշխատում, որոշները բենզինը վաճառում են խիստ սահմանափակ չափերով: Հանրապետությունում 1 լիտր բենզինի ստվերային գինն արդեն հասնում է 1000 դրամի: Ստեղծված իրավիճակի կապակցությամբ Հայ Ազգային Կոնգրեսը հայտարարում է.
* Հանրապետության կառավարությունն այսօր ի վիճակի չէ իրականացնել ճգնաժամային կառավարում, մինչդեռ անգամ Ղարաբաղյան պատերազմի եւ շրջափակման ծանր տարիներին պետությունը կարողանում էր կարգավորել նմանօրինակ վիճակները:
* Ճգնաժամը նաեւ անխուսափելի հետեւանքն է այն թեթեւամիտ որոշման, որով ժամանակին, երբ անխափան գործում էր ՀՀ-ն սնող կոմունիկացիոն համակարգը, վերացվեցին պետական ռեզերվները: Այսօր ՀՀ-ում գոյություն չունեն նման ճգնաժամերից խուսափելու համար անհրաժեշտ պահուստային ֆոնդեր:
* Կառավարության կողմից նախօրոք մշակված եւ Իրանի Իսլամական Հանրապետության հետ մշակված չեն նման դեպքերում նրա տարածքով վառելիքի անհրաժեշտ ծավալների ներկրման սխեմաներ: Մշակված չեն նաեւ առաջին անհրաժեշտության նման ապրանքների ներկրման այլընտրանքային այլ սխեմաներ:
* Ոլորտի ծայրահեղ մոնոպոլիզացիան ավելի է խորացնում ճգնաժամի սրությունը»:
Կոնգրեսը պահանջում է անհապաղ իրականացնել հետեւյալ միջոցառումները.
«* Վերացնել հեղուկ վառելիքի ներկրման մենաշնորհը եւ հնարավորություն տալ բոլոր ցանկացողներին զբաղվել այդ գործով:
* Ստեղծել մեխանիզմներ, որոնք կկանխեն հեղուկ վառելիքի սակավության պայմաններում ապօրինի գնով դրա վաճառքը եւ գերշահույթների ստացումը, իսկ մինչեւ ճգնաժամի հաղթահարումը մտցնել բենզինի վաճառքի նորմավորում:
* Հանձնարարել պատկան մարմիններին՝ ճգնաժամի ավարտից հետո ապահովել առաջին անհրաժեշտության ապրանքների առնվազն մի քանի ամսվա համար անհրաժեշտ պահուստներ՝ ապագայում հնարավոր ճգնաժամերից խուսափելու համար»։
