«Հանրապետություն» կուսակցության քաղխորհրդի անդամ Սմբատ Այվազյանը այսօր դատարանի դահլիճում «Ազատություն» ռադիոկայանին տված հարցազրույցում հայտարարեց, թե իրեն շարունակում են անազատության մեջ պահել նախագահ Սերժ Սարգսյանի հրահանգով:
Այդ հրահանգը, ըստ փետրվարի 24-ից կալանավորված Սմբատ Այվազյանի, Սերժ Սարգսյանը տվել է իր վերջին ասուլիսում. «Դատարանին ինչ հրահանգեն՝ այն էլ անելու է: Իսկ հրահանգը Սերժ Սարգսյանը իր 100 օրվա վերաբերյալ մամուլի ասուլիսում ասաց՝ որ ջրհեղեղ չի լինի, եթե Հայաստանը Եվրախորհրդի առջեւ որոշակի պարտավորություններ չանի: Իսկ այդ որոշակի պարտավորությունները, առաջին հերթին, բանտարկյալներին էր վերաբերում: Այսինքն՝ ինքը հրահանգեց՝ «դուք հանգիստ գնացեք, իմ ասած ապօրինի որոշումները կայացրեք, ես տեր եմ»: Այսինքն՝ որեւէ սպասելիք դատարանից բացարձակ գոյություն չունի»:
Նա հաստատեց, որ իրեն քաղբանտարկյալ է համարում. «Իհարկե, միանշանակ»:
«Սպասելիքը հայ ժողովրդից է, Համաժողովրդական շարժումից է սպասելիքը, որ երկրում արդարադատությունը վերջապես կհաղթի, արդարադատություն կլինի,- ասաց Այվազյանը՝ հավելելով:- Եվ այս կարգի դատավորները, որոնք պատրաստ են միշտ հրահանգներ կատարելու, այս կամ այն պաշտոնյայի կամքը կատարելու, տեղ չեն ունենալու ապագա Հայաստանում»:
«Իսկ ձեզ պահելով ի՞նչ խնդիր են լուծում»՝ հարցին Սմբատ Այվազյանը արձագանքեց. «Ինձ նման բազմաթիվ մարդիկ կան, որոնք շատ ակտիվ են լինելու ամբողջ Համաժողովրդական շարժման ընթացքում, մենք դրսում լինենք՝ շատ ավելի մեծ թափ կստանա շարժումը, ես կարծում եմ՝ այդ պատճառով անազատության մեջ են փորձում պահել»:
«Որոշ մարդիկ ասում են, որ Հայաստանում «թավշյա» հեղափոխություն է լինելու կամ «եռագույն» հեղափոխություն է լինելու. ես կարծում եմ, որ Հայաստանում քաղաքական դատավարությունների հեղափոխություն է լինելու: Մենք էլ մեր բաժին հեղափոխությունը անելու ենք դատարաններում, դատական նիստերի ժամանակ, դատարանների միջոցով»,- հայտարարեց ընդդիմադիր գործիչը:
