Ներկայանալի տեսք կունենանք
![\"\"](\"https://www.aravot.am/2008/aravot_arm/July/26/p7.jpg\")
Օգոստոսի 8-ին Պեկինում մեկնարկող ամառային 29-րդ օլիմպիական խաղերի մասնակից Հայաստանի հավաքականներն ու անհատ մարզիկներն արդեն ճամպրուկներն են հավաքում:
Համաշխարհային այս խոշորագույն տոնահանդեսում ներկայանալի տեսք ունենալու նպատակով Հայաստանի ազգային օլիմպիական կոմիտեն ժամանակին համագործակցության պայմանագրեր է ստորագրել մարզական եւ նորաձեւ հագուստներ արտադրող ֆիրմաների հետ:
Խաղերի բացման հանդիսավոր արարողության շքերթին Հայաստանի մարզական պատվիրակությունը կմասնակցի հայրենական «Կիվերա Նայնոմիս» նորաձեւության ստուդիայի դիզայներների պատրաստած հագուստով:
Օլիմպիական մրցասպարեզներում մեր մարզիկները եւ մարզիչները կկրեն «Բոսկո» ֆիրմայի արտադրած մարզազգեստները: Իսկ տարբեր մարզաձեւերի մարզիկները հանդես կգան հանրահայտ «Ադիդաս» ֆիրմայի տրամադրած մասնագիտական համազգեստներով:
Արժե օլիմպիական չեմպիոն դառնալ
Նախաօլիմպիական այս ժամանակաշրջանում Խաղերի մասնակից մարզիկներին ոգեւորելու համար ամբողջ աշխարհում խրախուսական մրցանակներ սահմանելու մի իսկական մրցավազք է սկսվել: Տարբեր երկրների մարզական կազմակերպությունները, անգամ պետությունների առաջին դեմքերը ապագա չեմպիոններին եւ մեդալակիրներին դրամական ու նյութական խրախուսական մրցանակներ են խոստանում:
Հայաստանում այդ խնդիրը պետական մակարդակով լուծվել է դեռ 2001 թվականին: Կառավարության՝ նույն տարվա մայիսի 29-ի թիվ 462 որոշումով Հայաստանի դրոշի ներքո հանդես եկող եւ մրցանակային տեղ գրավող յուրաքանչյուր մարզիկի պետության բյուջեից շնորհվում է պատկառելի խրախուսական մրցանակ հետեւյալ չափաբաժիններով. ոսկի՝ $40 հազարին համարժեք, արծաթ՝ $30 հազարին, բրոնզ՝ $20 հազարին համարժեք դրամ, իսկ նրանց անձնական եւ հավաքականների գլխավոր մարզիչներին՝ 50%-ի չափով:
Սրանից բացի, հայաստանցի օլիմպիական չեմպիոնը ՀԱՕԿ-ի նախագահ Գագիկ Ծառուկյանից կստանա դրամական եւ նյութական մրցանակներ, որոնց ընդհանուր գումարը կկազմի $700 հազար:
Խորեն Գեւորը՝ RBU-ի տիտղոսի հավակնորդ
![\"\"](\"https://www.aravot.am/2008/aravot_arm/July/26/p5.jpg\")
Բռնցքամարտի եվրոպական միությունը պրոֆեսիոնալ բռնցքամարտիկ Խորեն Գեւորին անվանել է միջին քաշային կարգում չեմպիոնի թափուր տեղի համահավակնորդ:
Հայ բռնցքամարտիկի դեմ ելնելու է պաշտոնական հավակնորդ, ֆինն Ամին Ասիկյայնենը: Կազմակերպչական բոլոր խնդիրները լուծելու վերջնաժամկետ նշանակվել է սեպտեմբերի 4-ը: Հակառակ դեպքում, EBU-ն մարտը կազմակերպելու իրավունքի համար մրցույթ կհայտարարի: Ֆիննական կողմն արդեն հասցրել է հայտարարել, որ իրենք անելու են ամեն բան, որպեսզի մարտը կայանա իրենց երկրում:
Այս քաշային կարգում չեմպիոնի տեղը թափուր է մնացել այն բանից հետո, երբ տիտղոսակիր Սեբաստյան Սիլվեստրը WBA-ի վարկածով չեմպիոն Ֆելիքս Շտուրմի հետ հանդիպելու նպատակով հրաժարվեց գոտուց:
