ԴԱՏԸ ՉՍԿՍՎԱԾ՝ ՀԵՏԱՁԳՎԵՑ

Երեկ Երեւանի Կենտրոն եւ Նորք-Մարաշ համայնքների ընդհանուր իրավասության դատարանում նշանակված էր «Հանրապետություն» կուսակցության քաղխորհրդի անդամ, դեռեւս փետրվարի 24-ին ձերբակալված Սմբատ Այվազյանի դատաքննությունը: Դատարանի դահլիճում ներկաները Սմբատ Այվազյանին դիմավորել են «Ազատություն» եւ «Հաղթանակ» վանկարկումներով: Հիշեցնենք, որ նա մեղադրվում է ՀՀ ՔՕ 316 հոդվածի 1-ին մասով՝ «իշխանության ներկայացուցչի նկատմամբ բռնություն կիրառելու», նաեւ 235 հոդվածի 4-րդ մասով՝ «սառը զենք» կրելու համար: Դատական նիստի հենց մեկնարկում դատավոր Գագիկ Ավետիսյանը որոշեց «պատժիչ» միջոցներ կիրառել նիստերի դահլիճում գտնվողներից մի քանիսի, այդ թվում` Բաբկեն Արարքցյանի, Սուրեն Աբրահամյանի եւ ֆոտոթղթակից Գագիկ Շամշյանի նկատմամբ՝ նրանց դահլիճից դուրս հանելով: Դատական նիստը հետաձգվեց մինչեւ հուլիսի 28-ը: