Պեկինում կայանալիք ամառային 29-րդ օլիմպիական խաղերի մեկնարկին մնում է ընդամենը 23 օր:
«Առավոտը» ճշտեց, թե այս օրերին յոթ մարզաձեւերի մեր հանրապետության հավաքականներն ու անհատ մարզիկները որտե՞ղ են եւ ինչո՞վ են զբաղված: Որ 63 կգ քաշային ծանրորդ Մելինե Դալուզյանն ուսումնամարզական հավաքի է մեկնել Պոդոլսկ եւ մեր հինգ տղաները նրան միանալու են հուլիսի 21-ին, արդեն տեղեկացրել ենք:
Հունահռոմեական ըմբիշները ներկայումս հավաք են անցկացնում Մինսկում, իսկ ազատ ոճայինները՝ Բորժոմում: Երկու հավաքականները Երեւան վերադառնալու են հուլիսի 29-ին, իսկ Պեկին կմեկնեն օգոստոսի 5-ին:
Բռնցքամարտիկները Տաշքենդում անցկացրած ուսումնամարզական հավաքից պետք է վերադառնային երեկ: Նրանք նախապատրաստությունը շարունակելու են Աբովյան քաղաքում, իսկ մրցավայր կմեկնեն օգոստոսի 1-ին:
Հրաձիգ Նորայր Բախտամյանը գերադասել է նախապատրաստության վերջին փուլն անցկացնել Երեւանում ու միաժամանակ շարունակել մեջքի վնասվածքի ապաքինումը: Նա Խաղեր մեկնելու է հուլիսի 30-ին:
Ձյուդոիստ Արմեն Նազարյանը Հրազդանում է, իսկ Հովհաննես Դավթյանը՝ Գյումրիում: Նրանք հուլիսի 17-27-ը վերջին հավաքը կանցկացնեն Ծաղկաձորում եւ հուլիսի 30-ին կընկերակցեն Նորայր Բախտամյանին:
Նիզականետորդ Մելիք Ջանոյանը նույնպես նպատակահարմար է գտել առայժմ մարզումները շարունակել հարազատ Գյումրիում: Հուլիսի 20-ին նա մեկնելու է Ծաղկաձոր, այնուհետեւ կրկին վերադառնալու է տուն: Նրա համար տոմս պատվիրված է օգոստոսի 17-ին:
Արագավազորդ (100 մետր) Անի Խաչիկյանը օլիմպիական խաղերին մասնակցելու է «սպիտակ քարտով»: Նույն կարգավիճակն ունի նաեւ լողորդ Միքայել Քոլոյանը՝ 100 մետր ազատ ոճ: Եվ քանի որ այս երկուսից Խաղերում ակնկալիք չկան, նրանք մարզվում են Երեւանում:
