Ընդդիմության հանրահավաքների օրերին միջմարզային երթուղիները չեն սպասարկվում
Երեկ միջմարզային տրանսպորտը կրկին կաթվածահար վիճակում էր: Արտաշատի, Արարատի, Էջմիածնի, Աբովյանի եւ այլ միջմարզային երթուղագծեր, ՀՀ իշխանությունների հրահանգով, կրկին ուղեւորներին չեն սպասարկել, որպեսզի ընդդիմության երեկվա հանրահավաքին մարդ չբերեն: Մինչդեռ մարզերի հարյուրավոր բնակիչներ մայրաքաղաքում կարեւոր գործեր ունեին եւ շատերն ի վիճակի չլինելով տաքսիներով Երեւան հասնել, ստիպված են եղել գործերը հետաձգել: Վաղ առավոտից Աբովյան քաղաքի կանգառներում խառնաշփոթ էր, աբովյանցիները անհույս, ժամերով թիվ 261 եւ 262 երթուղայիններին էին սպասում: «Սա ի՞նչ ձեւ է, հանրահավաքի օրերին մեզ կալանավոր են դարձնում, որ տնից դուրս չգանք, ես հանրահավաք չեմ գնում, հիվանդանոց եմ շտապում ու 2-3 հազար դրամ էլ չունեմ, որ տաքսիով ման գամ: Վերջիվերջո, ինչ-որ մեկը սրա համար պիտի պատասխան տա՞, թե՞ ոչ»,- «Առավոտի» հետ զրույցում դժգոհեց աբովյանցի մի կին:
Արամ Վարդանյանի խոսքերով էլ. «Ես Երեւանում շինարարության վրա եմ աշխատում եւ օրական 4 հազար դրամ եմ վաստակում: Այսօր տաքսիով պետք է գնամ Երեւան եւ, պատկերացնո՞ւմ եք, աշխատածս պետք է տաքսիներին տամ եւ այսօր չեմ կարող անգամ հացի փող տուն տանել: Իսկ չգնալ չեմ կարող, քանի որ աշխատանքից կզրկվեմ»:
Երեկ ժամը 11-ից դադարել էր գործել նաեւ Երեւան-Էջմիածին երթուղին: Հարկադիր գործազրկության էին մատնվել նաեւ Աշտարակի վարորդները: Նշենք, որ այս երթուղիների գծատերերն առաջին անգամ չէ, որ ՀՀ իշխանությունների քմահաճույքով մրցույթով շահած իրենց երթուղագծերը չեն սպասարկում:
Այս առնչությամբ մեր հարցին ի պատասխան, տրանսպորտի եւ կապի նախարարի մամուլի քարտուղար Սուսաննա Տոնոյանը հայտնեց, որ նախարարությունը կեսօրի դրությամբ միջմարզային տրանսպորտի խափանման վերաբերյալ որեւէ ահազանգ չի ստացել. «Նախարարության տրանսպորտի տեսչության աշխատակիցներն ի գիտություն ընդունելով «Առավոտի» լրագրողի ահազանգը, տեղում կուսումնասիրեն փաստի իսկությունը եւ եթե առկա է միջմարզային տրանսպորտի չվացուցակի խախտման դեպք, ապա օրենքով սահմանված կարգով կձեռնարկվեն համապատասխան միջոցներ, այդ թվում՝ նախատեսվում են վարչական տույժեր, իսկ կրկնվելու դեպքում՝ ընդհուպ մինչեւ լիցենզիայից զրկում»:
Նշենք, որ ընդդիմության հունիսի 20-ի հանրահավաքին նույնպես միջմարզային տրանսպորտը չէր սպասարկել, սակայն որեւէ գծատեր պատասխանատվության չենթարկվեց:
