Երեկ Համաժողովրդական շարժման, «Հիմա» երիտասարդական շարժման ներկայացուցիչները եւ այլախոհ քաղաքացիները հավաքվել էին քաղաքապետարանի դիմաց՝ «Ժողովրդավարությանը խաբել չի՛ կարելի», «Կատարե՛ք ԵԽԽՎ-ի պահանջները», «Մի՛ պղծեք ժողովրդավարությունը», «Ոչ՝ ստրկությանը, մորթապաշտությանը, ոչ լեգիտիմին» եւ այլ պաստառներով: Արդեն հայտնի վանկարկումներին երեկ ավելացել էր եւս մեկը՝ «Մի՛-տինգ, մի՛-տինգ»: «28 հայտ ենք ներկայացրել հանրահավաք անցկացնելու, բոլորն էլ ոչ հիմնավոր, շինծու պատճառաբանություններով քաղաքապետարանը մերժել է: Այսօր պահանջել ենք, որ ի գիտություն ընդունվի մայիսի 23-ին, 24-ին հանրահավաքներ անցկացնելու մեր հայտերը եւ ապահովվի մեր ներկայացուցչի մասնակցությունը քննարկվող նիստում, որտեղ թույլատրվում կամ չի թույլատրվում հանրահավաք անցկացնելը: Քաղաքապետարանից պահանջում ենք, որ կատարվեն ԵԽԽՎ-ի պահանջները»,- «Առավոտին» ասաց Համաժողովրդական շարժման մասնակից Նորիկ Նորիկյանը: Ցուցարարները պահանջում էին նաեւ, որ քաղաքապետն իրենց ընդունի: Երկու ժամ սպասելուց հետո նրանց քաղաքապետարանից պատճառաբանեցին, թե քաղաքապետարանի լիազոր ներկայացուցչի կնոջ վիրահատության պատճառով իրենց այսօր պատասխան չեն կարող տալ եւ ոչ էլ քաղաքապետն է տեղում, որպեսզի ընդունի ցուցարարներին: «Ողբերգություն է, որ քաղաքապետը ինքնակամ չի կարող ընդունել քաղաքացու եւ պետք է անպայման վերեւների ցուցումով գործի: Մենք լինելու ենք հետեւողական: Եթե նման վերաբերմունքը շարունակվի, մենք հունիսի 20-ին ժողովրդին հրավիրելու ենք Ազատության հրապարակ»,- հեռանալուց առաջ հայտարարեցին ցուցարարները: Նրանք կարծում են, որ իրականում արհամարհելով ԵԽԽՎ պահանջները, իմիտացիա անելով եւ հակաօրինական պահվածքով՝ իշխանությունները Հայաստանն ավելի ու ավելի են տանում դեպի բռնապետություն:
