![\"\"](\"https://www.aravot.am/2008/aravot_arm/May/3/p15.jpg\")
Տարիների ձգձգումից հետո կոմպոզիտոր Նուբար Ասլանյանի այս ստեղծագործությունը վստահվեց Հայաստանի պետական երիտասարդական նվագախմբին:
«Առավոտը» իսրայելաբնակ կոմպոզիտոր Նուբար Ասլանյանից ստացել է էլեկտրոնային նամակ, որտեղ նա ներկայացնում է Հայաստանում իր «Սիփանա քաջեր» կոնցերտ-պոեմին առայսօր չանդրադառնալու պատճառները: Կոմպոզիտորը նամակին կից ներկայացրել է իր գրությունները՝ այդ թվում ՀՀ վարչապետ Ս. Սարգսյանին (22.2.2007թ.), ՀՀ մշակույթի նախարարին (13.04.08), Հայաստանի պետական ֆիլհարմոնիկ նվագախմբի գեղարվեստական ղեկավար Էդ. Թոփչյանին եւ նվագախմբի տնօրեն Ռ. Սիրունյանին (07.03.2008) ուղղված:
Վարչապետ Սերժ Սարգսյանին հասցեագրված նամակում կարդում ենք. «24 ապրիլի 2005թ. ավարտեցի փողի եւ սիմֆոնիկ նվագախմբի համար գրված «Սիփանա քաջեր» կոնցերտ-պոեմը՝ նվիրված Հայոց ցեղասպանության 90-րդ տարելիցին: Նույն թվի աշնանը ՀՀ մշակույթի նախարարությունը Կոմպոզիտորների միության եւ արտաքին գործերի նախարարության հետ, Էդվարդ Միրզոյանի հեղինակավոր կարծիքով (վերջինս ծանոթացել էր ստեղծագործության պարտիտուրին եւ լսել համակարգչից արտատպած ձայնագրությունը), կատարման երաշխավորությամբ պարտիտուրը հանձնել էր Ֆիլհարմոնիկ նվագախմբի դիրիժոր Թոփչյանին…»: Իր երկի կատարումը տարիներով ձգձգելու առիթով վիրավորված կոմպոզիտորը նամակն ավարտում է հետեւյալ կերպ. «Կտրականապես դեմ եմ, որ այսքանից հետո Թոփչյանի ձեռքերը դիպչեն իմ ստեղծագործությանը: Ես չեմ կարող ստեղծագործության կատարումից հետո անգամ սեղմել նրա ձեռքը»: Ֆիլհարմոնիկ նվագախմբի տնօրեն Ռ. Սիրունյանին հասցեագրված նամակում էլ կարդում ենք. «Հասկանում եմ, որ այսօր խոսել «անձնական» հարցերի շուրջ, երբ հանրապետությունում կան այլ խնդիրներ՝ անբարոյականություն է… Մյուս կողմից, անցնում է ժամանակը եւ մենք (ես եւ ստեղծագործության մենակատարը) Ֆիլհարմոնիկի տնօրինությունից առայսօր չունենք ոչ մի պաշտոնական տեղեկատվություն»:
Նուբար Ասլանյանը մեզ տրամադրել է նաեւ ՀՀ մշակույթի նախարարին 11.04.08թ. իր ուղարկած էլեկտրոնային նամակը, որում ասվում է. «Դուք հայտնում եք, որ «Սիփանա քաջեր» հեղինակային ստեղծագործությունը Հայաստանում ներկայացնելու առաջարկը փոխանցվել է Հայաստանի պետական երիտասարդական նվագախմբի գեղարվեստական ղեկավար Սերգեյ Սմբատյանին, ով պատրաստակամություն է հայտնել ձեզ հետ քննարկել այդ ծրագրի իրականացման հետ կապված մանրամասներ»:
«Առավոտը» պարզաբանում ստանալու համար կապվեց Ֆիլհարմոնիկ նվագախմբի տնօրեն Ռուզան Սիրունյանի հետ: «Այդ հարցով դիմել եմ մշակույթի նախարարին, խորհրդակցել նրա հետ, նա էլ ստեղծագործության կատարումը վստահել է Պետական երիտասարդական նվագախմբին»,- հավաստիացրեց տիկին Սիրունյանը:
Ֆիլհարմոնիկ նվագախմբի գեղարվեստական ղեկավար եւ գլխավոր դիրիժոր Էդուարդ Թոփչյանն էլ նշելով, որ «Սիփանա քաջերը» իր ճաշակով չէ, հավելեց, որ զարմացած է Ն. Ասլանյանի հետեւյալ մտքից՝ «Նա ասել էր՝ «ապրիլի 24-ին Թոփչյանը թող կատարի Վերդիի «Ռեքվիեմը», իտալացիները շատ զգացված կլինեն…»: Պատկերացումներիցս դուրս է, թե ինչպե՞ս կոմպոզիտորը կարող է նման ձեւով արտահայտվել Վերդիի գերհանճարեղ «Ռեքվիեմի» մասին: Ինձ համար Վերդին էլ է հայ, քանի որ նրա երաժշտությունը համամարդկային է: Կուզեի տեղեկացնել պարոն Ասլանյանին, որ համագործակցելով Հայաստանի կոմպոզիտորների եւ երաժշտագետների միության նախագահ մաեստրո Ռոբերտ Ամիրխանյանի հետ, այս տարի Ֆիլհարմոնիկ նվագախումբը ապրիլի 24-ին հնչեցրեց շվեյցարաբնակ Դավիթ Հալաջյանի «Մեսսա դի լումինեն», Պարույր Սեւակի «Եռաձայն պատարագը»՝ Արմեն Խանդիկյանի ռեժիսուրայով եւ Արթուր Ութմազյանի ասմունքով: Իսկ հաջորդ օրը՝ Վերդիի «Ռեքվիեմը»:
