Լրագրող Գայանե Առուստամյանը հայտարարություն էր տարածել, որ ամսի 23-ին, ժամը 14-16-ը Մատենադարանի մոտ է հրավիրում մարգինալ արվեստագետներին, ROCK սուբկուլտուրայի համակիրներին, ազատատենչ քաղաքացիներին եւ մոտոսիրահարներին՝ մասնակցելու «Ռոքն ընդդեմ մարդասպանի» կարգախոսով ակցիային: Ակցիան նվիրված էր Ցեղասպանության զոհերի հիշատակին: Քանի որ քաղաքապետարանը իրազեկումը չէր ընդունել, կազմակերպիչները որոշել էին ակցիայի մասշտաբները փոքրացնել, որովհետեւ մինչեւ 100 մարդ օրենքով թույլատրվում է հավաքվել առանց իրազեկման: Չնայած լրագրողի հրավերին հազիվ տասը մարդ էր արձագանքել, բայց ոստիկանները «դեպքի վայր» էին եկել մարտական տրամադրությամբ:
Մինչ այդ, վաղ առավոտյան Գայանե Առուստամյանի տուն էին այցելել Մաշտոցի ոստիկանապետի տեղակալ Գինոյանը, թաղային ոստիկան Լեւոն Մադաթյանը եւ ոստիկանության հետաքննության բաժանմունքի պետ Ալթունյանը: Լրագրողին ասել են, որ եկել են իրեն մեքենայով անվնաս հասցնելու ոստիկանական բաժանմունք, որպեսզի իր հետ այնտեղ զրուցի ոստիկանության Երեւան քաղաքի վարչության պետի տեղակալ Աղասի Կիրակոսյանը: Չնայած ոստիկանները երդվել են՝ «երեխեքիս արեւ՝ անվնաս կտանենք», լրագրողը հրաժարվել է առանց ծանուցագրի ներկայանալ ոստիկանություն: Ավելի ուշ, Աղասի Կիրակոսյանը Գ. Առուստամյանի հետ հեռախոսազրույցում ասել է, որ եթե նա հայտնվի Մատենադարանի մոտակայքում եւ կազմակերպի իր միջոցառումը՝ պատասխան կտա օրենքի ամենայն խստությամբ:
Մատենադարանի մոտ կայացած ակցիայի մասնակիցները պահել էին «Ապրիլի 24. 1915. Էնվեր, Թալեաթ, Ջեմալ: Մարտի 1. Սերժ Սարգսյան, Ռոբերտ Քոչարյան, Արթուր Բաղդասարյան», «Ինչ արժե 10 մարդու կյանքը», «Ինչպես կարող ենք կանխել մարդասպանությունները» մակագրություններով պաստառներ: Նրանք ասում են, որ իրենց համար ոչ մի տարբերություն չկա՝ երեք մարդ կազմակերպել են 1.5 մլն հայերի ցեղասպանություն, թե երեք մարդ կազմակերպել են 10 մարդու սպանություն. «Ամեն անպատիժ սպանություն կարող է ցեղասպանության վերածվել»: Երեք ոստիկաններ խլեցին պլակատները՝ դրանք բռնած երկու կանանց՝ Գայանե Առուստամյանի եւ Լալա Ասլիկյանի ձեռքերից ու կտոր-կտոր արեցին, ասելով՝ «անօրինական ցույց» է: Ոստիկանների եւ ակցիայի կազմակերպիչ ու մասնակից 5-6 կանանց միջեւ 40-45 րոպե տեւած լեզվակռիվն ավարտվեց առանց լուրջ միջադեպերի:
