ԿԱՊԵՐԻ ԿԱՐԵՎՈՐՈՒԹՅՈՒՆԸ

Պորտֆելների վերաբաշխման «բազմաքայլ» գործընթացի արդյունքում Անդրանիկ Մանուկյանը ազատվեց տրանսպորտի եւ կապի նախարարի պաշտոնից եւ նշանակվեց ՀՀ նախագահի խորհրդական: Ենթադրվում է, որ նրա պատասխանատվության ոլորտում են լինելու տնտեսական խնդիրները: Տրանսպորտի նախարարի պաշտոնում կարեւոր է արտաքին աշխարհի, առաջին հերթին՝ մերձավոր հարեւանների, այդ երկրների համապատասխան ղեկավարների հետ ամուր, հուսալի կապեր ստեղծելը, ինչը կարողացել է անել նախկին նախարարը: Հայաստանի տրանսպորտային խոշոր բեռնափոխադրումները իրականացվում են բարդ սխեմաներով (նավահանգիստներից լաստանավերով, այնուհետեւ՝ երկաթուղով), եւ այդ սխեմաները աշխատում էին նաեւ Ա. Մանուկյանի անձնական գործընկերային կապերի շնորհիվ: Առաջին հերթին, իհարկե, նա հաջողությամբ համագործակցում էր ՌԴ տրանսպորտի նախարար Իգոր Լեւիտինի ու երկաթուղու ղեկավար Վլադիմիր Յակունինի հետ: Վերջինիս ակտիվ մասնակցությամբ կոնցեսիոն կառավարման վերցվեց Հայկական երկաթուղին, եւ այդ ոլորտում խոշոր ներդրումներ են արվելու: Միշտ ջերմ էին պարոն Մանուկյանի հարաբերությունները Վրաստանի տրանսպորտի պատասխանատուների հետ, ինչի շնորհիվ առայսօր չեն բարձրացվել այդ երկրի տարածքով մեր բեռնափոխադրումների սակագները: Եվ նույնիսկ Թուրքիայի տրանսպորտի նախարարի հետ ստացվում էր նորմալ համագործակցություն՝ երկու երկրների միջեւ դիվանագիտական հարաբերությունների բացակայության պայմաններում: Կկարողանա՞ տրանսպորտի եւ կապի նոր նախարարը պահպանել եւ զարգացնել այդ կապերը: Հուսանք: