![\"\"](\"https://www.aravot.am/2008/aravot_arm/April/19/p4.jpg\")
Սամվել Բաբայանը վստահ է, որ ձերբակալվածները ազատ կարձակվեն, բայց՝ ոչ միանգամից
– 2006 թվականի հունվարի 9-ին տված հարցազրույցում Ղարաբաղի խնդրի կարգավորման հարցին պատասխանելիս ասել էիք. «Իրավիճակը շատ վտանգավոր եմ համարում: Շատ վատ է, ես վստահ եմ, որ հաջողության չենք հասնելու»: Հիմա ե՞ւս այդ կարծիքին եք:
– Եթե այսպես շարունակվի, ապա նույն կարծիքին եմ, որովհետեւ ակնհայտ է, որ Ադրբեջանը հարցերը փորձում է տեղափոխել ռազմական դաշտ կամ այլ միջազգային ատյան: Տեսեք, օրինակ, Կարս-Ախալքալաք երկաթուղու կառուցումը. սա ոմանք համարում են քայլ՝ ուղղված Հայաստանի մեկուսացմանը կամ դիտարկում են զուտ տնտեսական հարց: Ես այդպես չեմ կարծում, որովհետեւ տեսնում եմ, որ Ադրբեջանը, բացի մեզ մեկուսացնելու փորձերից, նաեւ նպատակ ունի Թուրքիայի հետ մատակարարման խնդիր լուծել: Ադրբեջանը հայտարարում է, որ անցնում է ՆԱՏՕ-ի ստանդարտներին: Իմ կարծիքով, այս երկաթուղին ավելի ռազմական նշանակություն ունի, քան այլ:
– Հայաստանում եւ Ղարաբաղում հասարակության բարոյահոգեբանական մթնոլորտը բավարա՞ր է, որպեսզի հարցի ռազմական լուծման դեպքում համարժեք հակահարված տրվի Ադրբեջանին:
– Ոմանք փորձում են ասել, որ ժողովուրդը հիասթափված է, չի կռվելու եւ այլն: Վստահեցնում եմ, այդպես չէ: Երբ դժբախտությունը, վտանգը դուռդ ծեծում է՝ այլեւս մոռացվում են բոլոր այդ կարգի խոսակցությունները: Ոգին բարձրացնելու խնդիրը կապված է լինելու ռազմական գերատեսչության քայլերից, թե ինչքանով ենք առաջին իսկ րոպեներից հաջողություններ ունենալու: Հայ ժողովուրդն իր էությամբ միշտ էլ դժվարության ժամին համախմբվող է, այնպես որ, այդ մասով ես մտավախություն չունեմ: Այո, բոլորս էլ հասկանում ենք, որ վարվում է ներքին քաղաքականություն, որին մեկը կարող է համաձայն լինել, մյուսը՝ ոչ, բայց երբ թշնամին գալիս է քեզ վրա, այդ ամենը արդեն էական նշանակություն չի ունենում: Այդ դեպքում մնում է մեկ բան՝ համախմբվել, ամբիցիաները մի կողմ թողնել եւ լուծել խնդիրը:
– Սեյրան Օհանյանը հենց ա՞յն թեկնածուն է, որը կկարողանա դժվարին այս խնդիրը լուծել:
– Իհարկե, շատ մեծ բեռ է, բայց, ճանաչելով Օհանյանին, համոզված եմ, որ կկարողանա կառուցվածքային եւ կադրային մեծ փոփոխություններ անել:
– Դուք մասնակցում էիք Սերժ Սարգսյանի երդմնակալության արարողությանը. ձեր կարծիքով՝ ի՞նչ կարող է անել նոր նախագահը երկրում առավել նորմալ իրավիճակ ստեղծելու համար:
– Այն քայլերը, ինչ արդեն անում է Սերժ Սարգսյանը՝ քայլեր են, որ պարտավոր է անել: Իսկ նա փորձում է բոլորին բերել օրենքի դաշտ՝ թե տնտեսական, թե քաղաքական առումով: Չեկա՞ն օրենքի դաշտ, չկարողացա՞վ այդ կամքը դրսեւորել, ուրեմն ճգնաժամ կլինի: Այդ քայլերի շարունակականությունը ապահովելը դժվար է լինելու, խոչընդոտները շատ են լինելու, որովհետեւ շատերի շահերն են տրորվելու:
– Ընդդիմությունը կարծես շարունակելու է իր գործողությունները, քանի որ չի ընդունում այս իշխանություններին:
– Եթե ընդդիմություն ասելով հասկանում եք Լեւոն Տեր-Պետրոսյանին եւ իր թիմին, ապա ես նրանց ընդդիմություն չեմ համարում: Նրանք մարդիկ են, ովքեր ցանկանում են ընդամենը իշխանություն: Ընդդիմությունը լինում է գաղափարական, որը կոնկրետ նշում է, թե ո՞ր քաղաքականությանն է դեմ, արտաքին ի՞նչ վեկտոր պիտի ունենա պետությունը, տնտեսական ինչպիսի՞ բարեփոխումներ են պետք, եւ առաջարկում է իր լուծումները:
– Այդ ամենը ասվում է:
– Ոչ մի բան էլ չի ասվում: Այն, ինչ իրենք ձեւակերպում են արտաքին հարաբերությունների հարցում, նույնն է, ինչ այսօր իշխանությունն է իրականացնում, ներքին հարցերում ասում են օլիգարխների եւ այլնի մասին, այսօր տեսնում ենք, որ Սերժ Սարգսյանն էլ պայքարում է, ուրեմն՝ ինչո՞վ են տարբերվում: Սերժ Սարգսյանը պետք է կարողանա իր թիմով բարելավել ժողովրդի վիճակը: Կարողացա՞վ բարելավել, ձեր ասած ընդդիմությունը ոչինչ չի կարողանա անել, չկարողացա՞վ՝ ունենալու ենք ճգնաժամ:
– Չե՞ք գտնում, որ մարտի 1-2-ի դեպքերից հետո ձերբակալվածների մասով, ի դեպ, որոնց մեջ են նաեւ ձեր մարտական ընկերները, պետք էր քաղաքական որոշում կայացվեր, եւ Սերժ Սարգսյանի՝ պաշտոնավարման անցնելուց անմիջապես հետո մարդիկ ուղղակի պետք է ազատ արձակվեին:
– Կարծում եմ, նման քայլ լինելու է, բայց ոչ այնպես, ինչպես դուք եք պատկերացնում՝ անմիջապես: Իմ կարծիքով, ներում շնորհվելու է, բայց ոչ հիմա: Ամեն դեպքում, եթե մարդիկ մեղավորություն ունեն, հանցանք են կատարել՝ դատարանը պետք է որոշում կայացնի: Իմ կարծիքով, զուտ քաղաքական դիրքորոշում հայտնածները, այո, պետք է անմիջապես ազատ արձակվեն:
– Ձեր մարտական մյուս ընկերոջը՝ գեներալ Մանվելի դեմ գործեր են հարուցվել, մինչ այժմ նրա գործերի մասին հայտնի չէ՞ր, ինչո՞ւ հիմա, երբ նա կողմնորոշվել էր դեպի այլ դաշտ: Որքանո՞վ եք բոլոր կռվածներդ ապահովված, որ հարմար պահի ձեր դեմ եւս գործեր չեն հարուցվի միայն նրա համար, որ այլ դաշտում եք:
– Կոնկրետ իմ մասով ասեմ, որ երբ իմ դեմ եւս գործ էին հարուցել, որեւէ տնտեսական մեղադրանք չեն կարողացել ներկայացնել: Ինչ վերաբերում է կոնկրետ Մանվել Գրիգորյանին, սխալ եմ համարում, երբ այս պահին են այդ բանը անում: Բայց մյուս կողմից՝ չի կարելի մեկին կուռք սարքել եւ հետո գցել ներքեւ, թեպետ սա մեր ազգի մեջ ընդունված է: Ես կառաջարկեի, որ ոչ մեկին չմեծարեին: Պատերազմում հաղթել է ժողովուրդը, որոշ մարդիկ որոշ դերակատարություն են ունեցել, եւ նրանց պետք է գնահատել իրենց դերին համարժեք: Եթե նայենք ընդհանուր ռազմաճակատի երկարությունը, ապա այն Ղարաբաղի հատվածում կազմում է մոտ 300 կիլոմետր, եւ այդ ամբողջ երկայնքում Մանվել Գրիգորյանը պաշտպանել է 25 կիլոմետր տարածք: Հարց է ծագում՝ մնացած տարածքները ովքե՞ր են պաշտպանել: Գիտե՞ք նրանց անունները: Ոչ: Իսկ ինչո՞ւ եք մեծարում մեկին, իսկ մոռանում՝ մյուսներին: Ո՞րն է եղել նպատակը:
– Ձեր կարծիքով՝ ո՞րն է եղել:
– Ես շատ լավ գիտեմ նպատակը, գիտեմ պատճառը, բայց չէի ցանկանա հիմա խոսել այդ մասին:
