![\"\"](\"https://www.aravot.am/2008/aravot_arm/January/25/p1.jpg\")
Արդարադատության նախարար Գեւորգ Դանիելյանը երեկ ընդունել է ԵԱՀԿ/ԺՀՄԻԳ ընտրությունների դիտորդական առաքելության իրավական ու քաղաքական վերլուծաբաններ Քերին Գեյներին եւ Լոլիտա Ցիգանեին, որոնց հետաքրքրում էր այն հարցը, թե որքանո՞վ է իրավաչափ ՀՀ վարչապետի կողմից գրանցումից հետո իր լիազորությունները չդադարեցնելը: Այս առնչությամբ նախարարը պարզաբանել է, թե «Ընտրական օրենսգրքի» 78-րդ հոդվածի դրույթները «դիսպոզիտիվ բնույթի են, ըստ որոնց՝ գրանցման պահից իրենց աշխատանքային պարտականությունների կատարումից ազատվում են միայն ՀՀ նախագահի այն թեկնածուները, որոնք գտնվում են պետական ծառայության մեջ կամ աշխատում են տեղական ինքնակառավարման մարմիններում»: Պարզաբանել է, թե սա համարվում է ընտրական երաշխիք գրանցված թեկնածուների համար: Ըստ Հայաստանի արդարադատության նախարարության մամուլի ծառայության հաղորդագրության՝ դիտորդները համաձայնել են նախարարի այն պարզաբանմանը, թե ՀՀ վարչապետը տվյալ դեպքում «ոչ թե պարտավոր է, այլ իրավունք ունի դադարեցնելու պաշտոնական պարտականությունները, քանի որ նշված կարգը ոչ թե իմպերատիվ, այլ դիսպոզիտիվ նորմ է»: «Առավոտի» կողմից հիշեցնենք, որ ճիշտ նույն կերպ որոշ իրավաբաններ փորձում էին ապարդյուն հիմնավորել Ռոբերտ Քոչարյանի բաց քվեարկության իրավաչափությունը՝ պնդելով, թե փակ, գաղտնի քվեարկությունը միայն իրավունք է, այլ ոչ պարտականություն:
