![\"\"](\"https://www.aravot.am/2008/aravot_arm/January/19/p9.jpg\")
Իր բեմական անվան մասին ասաց ամերիկացի ռեփերի կողմից այդպես «մկրտված» ամերիկահայ երգիչը:
– Շուրջ երկու տարի առաջ եկաք հայրենիք, հաստատվեցիք, կարճ ժամանակահատվածում դարձաք հայտնի, թողարկեցիք CD՝ երգչուհիներ Էմմիի, ուկրաինացի քույրեր Թուինձիի եւ այլոց հետ: Արդյոք հաջողությունների պատճառը հայաստանյան շոու-բիզնեսում հիփ-հոփ արենդբի ոճի բացակայությո՞ւնն էր:
– Անձնական կյանքիցս հիասթափված, որոշեցի շուրջ 3 ամիս անցկացնել հայրենիքում: Երբեք չեմ երազել երգիչ դառնալ, բայց փոքր տարիքից մուտք եմ գործել ամերիկյան շոու-բիզնես՝ իբրեւ երաժշտական պրոդյուսեր: Երեւանում մի երգ առաջարկեցի Էմմիին, որտեղ կային ռեփային հատվածներ, ավելի ուշ՝ նրա մոր՝ Նադեժդա Սարգսյանի հորդորով բեմ բարձրացանք: Հիշում եմ՝ գլխարկս քաշել էի աչքերիս, որ ինձ չճանաչեն: Եվ դրանից հետո…
– Եվ դրանից հետո, եթե հավատանք ասեկոսեներին, սիրահարվեցիք Էմմիին:
– Բացարձակ: Ես նրան ընդունում եւ ընկալում եմ որպես լավ ընկեր: Եթե հետաքրքիր է, ասեմ, որ սիրահարված եմ մասնագիտությամբ իրավաբան հայուհու եւ որոշել եմ կյանքս կապել նրա հետ: Մանավանդ, ես իրավաբաններին, ոստիկաններին, մի խոսքով՝ օրենքը հարգող մարդ եմ, թեեւ երբեմն հայտնվում եմ օրինախախտի դերում… Երեւանի կենտրոնում ձեռք եմ բերել բնակարան, ունեմ նաեւ հիմնական աշխատանք՝ DJ եմ CITY FM 106-ում: Ասեմ նաեւ, որ փետրվարի վերջին 6 ամսով մեկնելու եմ Ամերիկա՝ կապված պրոդյուսերական աշխատանքների հետ, բայց անպայման վերադառնալու եմ…
– Հայաստանցիներից շատերն են մեկնում արեւմուտք, տարվա կեսն աշխատում ու վերադառնում…
– Հարցի ենթատեքստը հասկացա: Ամերիկայում երբեք դրամով երգիչ սարքելու գործընթացին մասնակից չեմ եղել: Ես երաժշտական պրոդյուսեր եմ, որը թեւ ու թիկունք է կատարողին, մեծ մասամբ՝ հոգեբանական եւ այլ առումներով:
– Ձեր կարծիքով, հայաստանցի երգիչներն ինչպե՞ս կարող են դուրս գալ արեւմտյան շոու-բիզնես:
– Հոլիվուդյան շոու-բիզնեսում են նաեւ իսպանացի հայտնի կատարողներ Էնրիկե Իգլեսիասը, Լուիս Միգելը եւ այլք, բայց դա իր պատճառն ունի: Ամերիկայում անգլերենից հետո ընդունված է իսպաներենը: Դժվար է, եթե ոչ անհնար հայ կատարողների մուտքը ամերիկյան շոու-բիզնես…
– Հայերս էլ, ոչ իսպանացիների չափ, բայց, այնուամենայնիվ, որոշ տոկոս Ամերիկայում կազմում ենք…
– Շուտով մեկնում եմ ԱՄՆ, ճիշտն ասած՝ աչքիս տակ ունեմ Էմմիին: Կարծում եմ՝ նա ամերիկյան շոու-բիզնեսին հարիր «պրոդուկտ» է:
– 2007թ. վերջերին Երեւանի Ազատության հրապարակում ռուսաստանյան շոու-բիզնեսի աստղ Դիմա Բիլանի հետ ելույթ ունեցաք նաեւ դուք եւ Էմմին: Մեզ հայտնի է, որ ձեր դուետի կատարումից հետո Բիլանը ցանկություն է հայտնել գնել ձեր երգերից մեկը:
– Այո, դա «Երբեք չես կարող նույնը լինել» երգն էր: Բիզնեսի մասով ոչինչ չեմ կարող ասել, որովհետեւ դրանով զբաղվում է Նադեժդա Սարգսյանը: Միայն գիտեմ, որ երգը պետք է ձայնագրենք երեքով: Բիլանը կկատարի մեղեդային մասը, Էմմին՝ բեք վոկալը, ես էլ, ինչպես միշտ՝ ռեփային պարտիաները:
– Մի հարց եւս՝ ինչո՞ւ Սուպեր Սաքո եւ ոչ թե Սարգիս Բալասանյան…
– Սուպեր Սաքոն արեւելյան խմիչք է, այդ անունով ինձ կնքել է հայտնի ամերիկացի ռեփեր Քրափթը:
