Գնալով դժվարանում է
2008 թվականը Հայաստանի ծանրորդների համար անչափ պատասխանատու տարի է: Ամբողջ հանրապետությունը Պեկինի օլիմպիական խաղերում մեդալներ ամենից շատ ակնկալում է նախ եւ առաջ հենց նրանցից: Սակայն մարզաձեւի ֆեդերացիան այժմվանից մտածում է նաեւ 2012 թվականին Լոնդոնում կայանալիք օլիմպիական խաղերի մասին: Ու դրա համար լուրջ պատճառներ կան:
Երեկ մարզաձեւի հանրապետական ֆեդերացիայի նախագահ, ՀՀ սպորտի եւ երիտասարդության հարցերի փոխնախարար Սամվել Խաչատրյանը «Առավոտին» ասաց, որ ծանրամարտի միջազգային ֆեդերացիայի որոշմամբ 2009-2011 թթ. աշխարհի մեծահասակների երեք առաջնությունները նաեւ վարկանիշային մրցումների կարգավիճակ են ունենալու եւ 2012 թվականի օլիմպիական խաղերում այս կամ այն երկրի ծանրորդների թիվը որոշվելու է դրանցում ունեցած թիմային արդյունքների ընդհանուր հաշվարկով: «Դա նշանակում է, որ Հայաստանը ոչ միայն պետք է այդ առաջնություններին մասնակցի տղամարդկանց եւ կանանց ամբողջական հավաքականներով, այլեւ ձգտի կայուն արդյունքներ ցուցադրել եւ թիմային պայքարում բարձր տեղեր գրավել»,- պարզաբանեց Ս. Խաչատրյանը:
Եկել են փորձ ձեռք բերելու
Թունիսի ազատ եւ հունահռոմեական ոճի ազգային հավաքականների երկուական առաջատար ըմբիշներ իրենց մարզիչների հետ միասին ժամանել են Երեւան՝ Հայաստանի իրենց գործընկերների հետ համատեղ ուսումնամարզական հավաքներ անցկացնելու: Նրանք նախապատրաստվում են եկող ամիս Ստամբուլում (հունահռոմեական ոճ) եւ Կիեւում (ազատ ոճ) կայանալիք օլիմպիական վարկանիշային մրցումներին եւ հույս ունեն, որ հայաստանյան մարզումները շատ կօգնեն օլիմպիական ուղեգրեր նվաճելու համար:
Կանայք միանում են տղամարդկանց
Տիգրան Պետրոսյանի անվան շախմատիստի կենտրոնական տանն ընթացող շախմատի Հայաստանի տղամարդկանց բարձրագույն խմբի առաջնությանը զուգահեռ, հունվարի 12-22-ը կանցկացվի նաեւ կանանց բարձրագույն խմբի 62-րդ առաջնությունը: Հանրապետության 10 լավագույն շախմատիստուհիները, բացի Էլինա Դանիելյանից եւ Լիլիթ Մկրտչյանից, որոնք պատրաստվում են ավելի հեղինակավոր մրցաշարերի, շրջանաձեւ մրցակարգով կորոշեն երկրի չեմպիոնուհուն եւ մրցանակակիրներին: Շախմատիստուհիներից հինգն ունեն միջազգային կոչումներ, որի համար էլ առաջնությունում սահմանված է միջազգային վարպետի նորմա: Սակայն յուրաքանչյուր մասնակցի համար, կախված անհատական գործակցից, կատարվելու է նորմայի լրացման առանձին հաշվարկ:
Ազգայինը կխաղա Մալթայի մրցաշարում
Ֆուտբոլի Հայաստանի ազգային հավաքականը հանդես է գալու փետրվարի 2-6-ը Մալթայում անցկացվելիք չորս երկրների ընտրանիների մասնակցությամբ միջազգային ավանդական մրցաշարում, որն անցկացվելու է 14-րդ անգամ: Մեր թիմից բացի, մրցաշարին մասնակցելու են նաեւ տանտերերը, Բելառուսը եւ Իսլանդիան:
Արդեն հայտնի է նաեւ խաղացանկը: Հայաստանի հավաքականը փետրվարի 2-ին կհյուրընկալվի Մալթային, 4-ին՝ Բելառուսին եւ եզրափակիչ խաղը կանցկացնի փետրվարի 6-ին՝ Իսլանդիայի հետ:
Վերջնական խոսքը մնաց ՖԻՖԱ-ին
![\"\"](\"https://www.aravot.am/2008/aravot_arm/January/11/p7.jpg\")
Ֆուտբոլի աշխարհի 2010 թվականի առաջնության ընտրական մրցաշարի 5-րդ խմբի անդամ երկրների (Հայաստան, Իսպանիա, Բելգիա, Բոսնիա եւ Հերցեգովինա, Էստոնիա, Թուրքիա) ֆուտբոլային ղեկավարները դեռ դեկտեմբերի 21-ին պետք է հավաքվեին Բարսելոնայում՝ քննարկելու եւ հաստատելու ընտրական մրցաշարի այդ փուլի խաղացանկը եւ օրացույցը: Սակայն Ամանորի եւ Ծննդյան տոների կապակցությամբ որոշվել էր հավաքը հետաձգել:
Հունվարի 8-ին վերը նշված երկրների ֆեդերացիաների ներկայացուցիչների հանդիպումը կայացավ: Հայաստանը ներկայացրել են ազգային հավաքականի տեխնիկական տնօրեն Աշոտ Մանուկյանը եւ ՀՖՖ գործադիր տնօրենի տեղակալ Արմեն Մելիքբեկյանը:
Յուրաքանչյուր երկիր ներկայացրել է իր տարբերակը: Սակայն, ինչպես տեղեկացնում է ՀՖՖ մամուլի քարտուղարությունը, երբ երկար բանակցություններից հետո բոլոր կողմերն եկել են համաձայնության եւ խաղացանկը գրեթե պատրաստ է եղել, վերջին պահին խնդիրներ են ծագել Իսպանիայի եւ Թուրքիայի միջեւ: Ըստ այլ լրատվամիջոցների, տարաձայնություններ եղել են նաեւ այլ երկրների միջեւ: Ինչեւէ, երկրորդ փուլում բանակցությունները դադարեցվել են եւ, համաձայն գործող կանոնակարգի, այժմ աշխարհի առաջնության ընտրական մրցաշարի 5-րդ խմբի խաղացանկը վիճակահանությամբ պետք է որոշի ՖԻՖԱ-ն: Դա տեղի է ունենալու հունվարի 16-ին՝ Ցյուրիխում գտնվող ՖԻՖԱ-ի շտաբ-բնակարանում:
