![\"\"](\"https://www.aravot.am/2007/aravot_arm/December/11/p1.jpg\")
«Փորձեք հիշել կամ պարզել նաեւ, թե ո՛ր կենդանակերպի նշանի տակ ծնված երջանիկին են պատկանում թեկուզ Խորհրդային Հայաստանի վարչական միավորներից մեկի՝ Արտաշատի շրջանի հետեւյալ ձեռնարկությունները. Արտաշատի գինու գործարանը, նույն քաղաքի մեխանիկական գործարանը, Շահումյան գյուղի շարժական մեքենայացված շարասյունը, այդ գյուղում տեղակայված գյուղշին 5-րդ տրեստի ավտոպարկը, Արտաշատի «Սիրիուս» գործարանը, Արտաշատի կենցաղսպասարկման շենքը՝ վերածված կազինոյի, «Արտաշատ» գաստրոնոմը, Արտաշատի հին բաղնիքը, նույն քաղաքի հյուրանոցի ռեստորանը, Մխչյան գյուղի գինու գործարանը, շրջանի բոլոր գազալցակայանները, Մխչյանի ավտոձեռնարկությունը, Մխչյանի բետոնի գործարանը, Արաքս գետի երեք ավազահանքեր, հազարավոր հեկտար կազմող հողատարածքներ ու հանքավայրեր Նարեկ, Քաղցրաշեն, Ուրցաձոր, Գոռավան գյուղերում եւ Արարատի մարզի այլ բնակավայրերում»,- շաբաթ օրը հանրահավաքում հայտարարել է ՀՀ առաջին նախագահ Լեւոն Տեր-Պետրոսյանը: Թեեւ նա որեւէ անուն չի տվել, հասկանալի է, որ խոսքը փոխվարչապետ Հովիկ Աբրահամյանի մասին է: Տեր-Պետրոսյանի ելույթից հատվածները՝ 7-րդ էջում: Փոխվարչապետ Հ. Աբրահամյանը, ի պատասխան «Առավոտի» խնդրանքի, հրաժարվեց մեկնաբանել Լ. Տեր-Պետրոսյանի այս պնդումները:
