![\"\"](\"https://www.aravot.am/2007/aravot_arm/November/17/p5.jpg\")
«Մի հարցրու հայրենիքից, թե ինչ կարող է անել քեզ համար, այլ հարցրու, թե դո՛ւ ինչ կարող ես անել հայրենիքի համար». Ջոն Քենեդու այս խոսքերը ամբողջովին արդարացված են Լեւոն Ահարոնյան անունը կրող մարդու դեպքում: Նա ոչ միայն հարցրեց, այլեւ կատարեց ու կատարում է գործեր հայրենիքի բարգավաճման համար: Ապրելով հայրենիքից հեռու՝ նա իր աչալուրջ հայացքը մշտապես պահում է հայրենիքի վրա: Իրանահայ բարերար Լեւոն Ահարոնյանը Սփյուռքում ծնված եւ ապրող այն հայորդիներից էր, որի հայրենասեր ձեռնարկները թվարկելու համար բավականին ժամանակ է անհրաժեշտ:
1988թ. Հայաստանում տեղի ունեցած աղետաբեր երկրաշարժից հետո Լեւոն Ահարոնյանը թեմական խորհրդի միջոցով ընտրվում է Հայաստանին օգնություն հատկացնող հանձնախմբի նախագահ եւ կարողանում է աննախադեպ մեծ գումար, հագուստ եւ մթերք հավաքել՝ Հայաստան ուղարկելու համար:
Նա Իրանում էր, երբ հեռուստատեսությամբ լսեց Երեւանի թիվ 136 դպրոցի մասին, որը հրդեհվել էր ամբողջովին, եւ առանց սպասելու ու վարանելու եկավ ու հիմնովին վերանորոգեց այդ դպրոցը:
Լեւոն Ահարոնյանը գեթ վայրկյան չերկմտեց ու չափսոսաց, երբ որոշեց տարիներ շարունակ իր տան պատերը զարդարող՝ իր իսկ որսած կենդանիների չորացրած արձանները նվիրել ՀՀ բնության պետական թանգարանին: Իսկ երբ տեսավ, թե ինչ քարուքանդ վիճակում է թանգարանի շենքը, այն իր միջոցներով հիմնովին նորոգեց:
Իսկ այն, ինչ արեց Լեւոն Ահարոնյանը Հայաստանի դպրոցաշինության գործում՝ արժանի է գովեստի ամենաշռայլ բառերին:
Երբ Լեւոն Ահարոնյանը ծանոթանում է Հայաստանի դպրոցների գույքի անմխիթար վիճակին, ցավում է, որ հայ երեխան դպրոցական այդպիսի հին աթոռին է նստում, եւ ջարդված սեղանին է իր դասերը սերտում: Այդ մտահոգությունները դառնում են նախագիծ եւ նա 2003թ. հիմնում է «Հայ դպրոց» հիմնադրամը: Եվ արդյունքում՝ այսօր Հայաստանի սահմանամերձ կարիքավոր դպրոցների 15.000 աշակերտներ սովորում են նոր դպրոցական սեղան-աթոռների վրա:
Անգնահատելի է Լեւոն Ահարոնյանի հայանպաստ եւ ազգանվեր գործունեությունը ինչպես Իրանում, այնպես էլ Հայաստանում: Հատկապես մեծ է Լեւոն Ահարոնյանի ներդրումը Իրանում հայ մշակույթի եւ լեզվի պահպանման գործում:
Եվ այս շարքը կարելի է երկար շարունակել……
Այսօր Լեւոն Ահարոնյանի ծննդյան 77-ամյակն է: Մի մարդու, որն իր կյանքի ոչ մի վայրկյանը անիմաստ չի ապրել:
Շնորհավոր ծնունդդ, Մեծ Հայ:
