ՈՉ ՍՏՈՒԳՈՒՄ ԵՆ ՎԿԱՆԵՐԻ ԱՍԱԾՆԵՐԸ, ՈՉ՝ ՀԱՎԱՏՈՒՄ

Երկուշաբթի ՀՀ քրեական վերաքննիչ դատարան անհայտ պատճառով չներկայացավ վկա Նելլի Գասպարյանը

Վերջինս վկայություն էր տվել նախորդ դատական նիստի ժամանակ Վիրաբ Գասպարյանի նկատմամբ հարուցված քրեական գործի շրջանակներում: Նախագահող Ժորա Հովսեփյանը նրան բերման ենթարկելու մասին որոշում կայացրեց: Վիրաբ Գասպարյանը մեղադրվում է Հայկ Մելիքյանի («Օշականցի Հայկո» մականունով) դեմ 2004թ. նոյեմբերի 17-ի լույս 18-ի գիշերը Հալաբյան փողոցում գտնվող «Բոուլինգ» կենտրոնի եւ «Տաթեւիկ» շոգեբաղնիքի տարածքում մահափորձ կատարելու մեջ:

Աջափնյակ եւ Դավիթաշեն համայնքների առաջին ատյանի դատարանը նրան դատապարտել է 9 տարվա ազատազրկման: Այս գործով կա մեկ տուժող էլ՝ Արագածոտնի մարզի Արեգ գյուղի բնակիչ Գեւորգ Խաչատրյանը, որը դեպքի օրը գտնվելով իր «Նիվա» ավտոմեքենայի մեջ, որովայնի շրջանում ստացել էր հրազենային վնասվածք:

Դատարանը հրապարակեց «Բոուլինգ» կենտրոնի մատուցող Էլյա Պետրոսյանի նախաքննական եւ դատաքննական ցուցմունքները:

Այս վկան նախաքննական իր ցուցմունքում նշել էր, որ դեպքի օրը, երբ ոստիկաններ են եկել իրենց օբյեկտ ու հարցրել, թե կրակոցի ձայն լսե՞լ է, պատասխանել է, որ կրակոցի ձայն չի լսել: Նա չի հիշել, թե այդ օրն իրենց մոտ որքան հաճախորդներ են եղել, ո՞վ էր նրանցից վերջին հեռացողը:

Քննիչի հարցին, թե Վիրաբին (հայտնի է «Բանգլադեշցի Վիրաբ» մականունով) ճանաչո՞ւմ է, մատուցողը պատասխանել էր, որ՝ ոչ, լսել է միայն նրա մասին: Իսկ «Օշականցի Հայկոյին» ճանաչել է տարբեր օբյեկտներում աշխատելու ընթացքում: Վկան առաջին ցուցմունքում ասել էր, որ դեպքի օրը վերջինիս չի տեսել:

2005 թվականին քաղաքի դատախազությունում նույն վկան՝ Էլյա Պետրոսյանը, լրացուցիչ ցուցմունք տալու ժամանակ ասել է, որ կարմիր գույնի արտասահմանյան մեքենայով իրենց օբյեկտ («Բոուլինգի» կողքին գտնվող «Մեծ տնակ» կոչվող բացօթյա սրճարան) է մտել մի քանի տղամարդ, իսկ ինքը տեսել է Հայկոյին: «Մեծ տնակում» հաճախորդները մնացել էին մինչեւ ժամը 23-ի սահմանները: Նրանց հեռանալուց հետո, ըստ վկայի, լսվեցին կրակոցի ձայներ եւ ավտոմեքենայի ճռռոց:

Մեկ այլ հարցաքննության ժամանակ՝ 2006թ. հունվարի 26-ին, այս վկան լրացուցիչ ցուցմունք է տալիս, թե կռվի մասին իրեն պատմել է մենեջեր Արթուրը (Մերդինյան ազգանունով). «Արթուրն ասաց, թե Վիրաբն ու Հայկոն են եղել, ինչ-որ Արտակ: Այլ տղաների անուն չտվեց: Ասաց, որ զենքը եղել է Վիրաբի մոտ»:

Վիրաբ Գասպարյանի անունը (որը պնդել է, որ զենքից ու կրակոցից տեղյակ չէ) այս վկայի ցուցմունքում հայտնվում է այսկերպ: Առաջին ատյանի դատարանում Էլյա Պետրոսյանն ասել էր. «Քննիչը ստիպել է, որ ասեմ, թե Արթուրն է պատմել: Գրում էի, որովհետեւ ասում էր, որ կպահի այստեղ: Քննիչի թելադրանքով գրել եմ այն, որ զենքը Վիրաբի մոտ է եղել, որ Վիրաբն է կրակել»:

Վիրաբ Գասպարյանի պաշտպան Նիկոլայ Բաղդասարյանն ասաց, որ քրեական գործ պետք է հարուցվի կամ վկաների, կամ քննիչների նկատմամբ: «Այս գործով գոյություն չունի գեթ մի վկա, որին խոշտանգած չլինեն,- հայտարարեց փաստաբանը, ապա հավելեց,- չեմ ընդունում այն դատարանի հայտարարությունը, որն ասում է՝ օբյեկտիվ եմ քննել գործը, երբ վկաները պնդում են, թե իրենց նկատմամբ բռնություններ են եղել»: Իսկ Վիրաբ Գասպարյանի երկրորդ պաշտպանը՝ փաստաբան Կրոմվել Գրիգորյանն ուշադրություն հրավիրեց այն հանգամանքի վրա, որ վկաների, մասնավորապես Նելլի Գասպարյանի եւ Էլյա Պետրոսյանի ցուցմունքները բովանդակային առումով գրեթե կրկնվում են:

Հ. Գ. Այս գործով տուժողները նույնպես իրենց «յուրահատկություններն» ունեն. մեկը դատարան չի գալիս եւ նրա նկատմամբ բերման որոշում կա, մյուսը՝ «Օշականցի Հայկոն», հետախուզման մեջ է: