![\"\"](\"https://www.aravot.am/2007/aravot_arm/October/12/p1.jpg\")
Երեկ ցերեկը «Առավոտի» խմբագրություն էր ներխուժել կանանց եւ տղամարդկանց մի խումբ եւ հարձակվել թերթի լրագրող Ռուզան Մինասյանի վրա: Նրանք փորձում էին հաշվեհարդար տեսնել լրագրողի նկատմամբ՝ դժգոհ լինելով մեր թերթի նախորդ օրվա հրապարակումից: Հարձակվողները 2002 թվականի հունիսի 24-ին սպանվածների հարազատներն էին եւ իրենց վայրագությունը «բացատրում էին» նրանով, որ «Առավոտը», իրենց կարծիքով, իրավունք չուներ հրապարակել այն սպանությունների համար դատապարտվածի նամակը, որտեղ նա պնդում էր իր անմեղությունը: Քանի որ ջարդարարները չէին հանդարտվում, սեռական հայհոյանքները (նաեւ կանանց շուրթերից) եւ քաշքշուկը շարունակվում էին, թերթի աշխատակիցները դիմել էին Կենտրոնի ոստիկանություն, որի ներկայացուցիչները օպերատիվ կերպով արձագանքեցին ահազանգին եւ հարձակվողներին կարգի հրավիրեցին: Հարուցվել է քրեական գործ՝ 164-րդ հոդվածով՝ «մի խումբ անձանց կողմից լրագրողի մասնագիտական գործունեությունը խոչընդոտելը՝ զուգորդված ֆիզիկական հաշվեհարդարի սպառնալիքներով»: Սակայն հարձակվողները սպառնալիքներով չէին սահմանափակվում եւ վնասվածք են հասցրել Ռուզանին, որն այսօր այցելելու է դատական բժշկի: Լուսանկարում՝ լրագրողի աշխատասենյակը հարձակումից հետո:
