Օրերս ԱԺ հասարակայնության հետ կապերի վարչությունը հաղորդագրություն էր տարածել, ըստ որի՝ Ստրասբուրգում ԵԽ Նախարարների կոմիտեի Ագոյի դիտարկման հանձնախմբի անդամների հետ հանդիպման ժամանակ ԵԽԽՎ-ում ՀՀ պատվիրակության անդամ Մհեր Շահգելդյանը կարեւորել է մասնավորապես «ԱԺ-ում պատգամավորների հայտարարությունների եւ հարցուպատասխանի ամբողջական հեռարձակման հրամայականը»:
Երեկ էլ «Ժառանգությունը» հաղորդագրություն տարածեց՝ մանրամասն ներկայացնելով, թե ինչ հանդիպումներ է ունեցել ԵԽԽՎ-ում իրենց կուսակցությունը ներկայացնող Րաֆֆի Հովհաննիսյանը: Հոկտեմբերի 1-ին նա Եվրոպական ժողովրդական կուսակցություն քաղաքական խմբի նիստում իր տեսակետներն է ներկայացրել Ադրբեջանի պատվիրակ Գյուլթաքին Հաջիեւայի «Միգրացիայի միջազգային կազմակերպության գործունեությունը» թեմայով զեկույցի վերաբերյալ: «Խմբի անունից զեկուցողի պարտականությունը ԵԺԿ-ի արժեքները առավելագույնս վերհանելն է, այլ ոչ թե ԼՂ խնդրի շուրջ հատվածական ու անհիմն տեղեկություններ «խցկելու» միջոցով միավորներ հավաքելը»,- ասել է Րաֆֆի Հովհաննիսյանը: «Ժառանգության» ղեկավարը բազմաթիվ հանդիպումներ է ունեցել, որոնց ընթացքում եվրոպացի պաշտոնյաների ուշադրությունն է հրավիրել Նախիջեւանում Ջուղայի միջնադարյան գերեզմանատան խաչքարերի ավերման հետ կապված իրավիճակի վրա՝ ընդգծելով հետագա կտրուկ քայլերի անհրաժեշտությունը: Հոկտեմբերի 2-ին ԵԽԽՎ լիագումար նիստում քննարկված «Հումանիտար ճգնաժամ Դարֆուրում» զեկույցի շուրջ Րաֆֆի Հովհաննիսյանը ելույթ է ունեցել ու հայտարարել. «Հայոց ցեղասպանությունից, հայրենազրկումից մինչեւ հրեաների ողջակիզումը, Կամբոջայից եւ Ռվանդայից մինչեւ Դարֆուր՝ մարդ էակն ունի բացարձակ իրավունք՝ կյանքի, արժանապատվության, ինքնության ու հայրենիքի»:
Երեկ Րաֆֆի Հովհաննիսյանը Ստրասբուրգից մեկնել է Ռեյկյավիկ՝ որպես Հայաստանի պատվիրակության անդամ մասնակցելու ՆԱՏՕ-ի խորհրդարանական վեհաժողովին:
