![\"\"](\"https://www.aravot.am/2007/aravot_arm/October/3/p5.jpg\")
Այսօր Տիգրան Պետրոսյանի անվան շախմատիստի կենտրոնական տանը մեկնարկում է շախմատի աշխարհի մինչեւ 20 տարեկան տղաների եւ աղջիկների առաջնությունը: Այս տարիքային խմբի վարկանիշն այնքան բարձր է, որ չեմպիոնին միանգամից գրոսմայստերի կոչում է շնորհվում, ինչպես անցած տարի եղավ Զավեն Անդրիասյանի պարագայում:
Առաջնության մասնակիցների հիմնական մասն արդեն ժամանել է Երեւան եւ տեղավորվել «Անի» հյուրանոցում:
Հայաստանի շախմատի ֆեդերացիան նման մակարդակի մրցաշարերի կազմակերպման հարուստ փորձ ունի: Սակայն երեկվա դրությամբ Շախմատիստի կենտրոնական տանն իրականացվող նորոգումն ամբողջությամբ դեռ չէր ավարտվել: Բացի դա, շենքի հենց առջեւ ճանապարհաշինարարական մեծ աշխատանքներ են ընթանում եւ տեխնիկայի աղմուկը, փոշին կարող են խանգարել մրցաշարի նորմալ ընթացքին: Մեր այս մտահոգությունները երեկ փարատեց Հայաստանի շախմատի ֆեդերացիայի գործադիր տնօրեն Հրաչյա Թավադյանը: «Խնդիրներ չեն լինի,- ասաց նա:- Շախմատի տան նորոգումը նախատեսված է եղել կատարել երկու փուլով, մինչեւ այս առաջնության մեկնարկը եւ ավարտից հետո: Հիմա զբաղված ենք մաքրության հաստատումով: Վաղն ամեն ինչ պատրաստ կլինի: Ինչ վերաբերում է դրսի աշխատանքներին, շինարարների հետ պայմանավորվել ենք, որպեսզի մրցման ժամերին դադարեցնեն աշխատանքը»:
Առաջնության գլխավոր մրցավար, միջազգային կարգի մրցավար Արմեն Նիկողոսյանը նույնպես հույս հայտնեց, որ այս անգամ շինարարներն իրենց խոստումը չեն դրժի, ինչպես եղավ Համահայկական խաղերի ժամանակ:
