![\"\"](\"https://www.aravot.am/2007/aravot_arm/September/8/p1.jpg\")
ԱԺ սոցիալական, առողջապահության եւ բնապահպանական հարցերի մշտական հանձնաժողովի նիստում երեկ երկրորդ ընթերցմամբ քննարկվեց «Պատգամավորի կենսաթոշակային ապահովության մասին» օրենքի նախագիծը: Հիշեցնենք, որ այս նախաձեռնությամբ կտրուկ ավելացվում էին պատգամավորների թոշակները՝ հասնելով 225 հազար դրամի: Սակայն հանձնաժողովի փոխնախագահ, ՀՀԿ անդամ Մկրտիչ Մինասյանը, որ ներկայացնում էր այս օրինագիծը՝ հայտնեց, թե դրա հեղինակ, ՀՀԿ անդամ Ռաֆիկ Պետրոսյանը (լուսանկարում) նպատակահարմար չի համարում օրինագիծը երկրորդ ընթերցմամբ քննարկման ներկայացնելը: Կարելի է եզրակացնել, որ նախագահական ընտրություններին ընդառաջ՝ հանրապետական պատգամավորները ձեռնպահ են մնում այնպիսի նախաձեռնություններից, որոնք կարող են տեղիք տալ բացասական արձագանքների եւ ժողովրդի դժգոհությանը:
