![\"\"](\"https://www.aravot.am/2007/aravot_arm/September/4/p6.jpg\")
Դավիթաշենի գերեզմանոցի ճանապարհն այնքան քարուքանդ է, որ մարդիկ չեն կարողանում այցելել իրենց հանգուցյալների շիրիմներին:
«500 դոլար ենք ծախսել, որ Դավիթաշենի գերեզմանոցում մեր հանգուցյալին թաղենք, բայց չենք կարողանում այցելել շիրիմին: Մեզ քաղաքի ուրիշ գերեզմանոց հարմար չէր, սա մեր տանը մոտ է, դրա համար էլ այդտեղ թաղեցինք ու փոշմանեցինք»,- «Առավոտին» այսպիսի բողոքով է դիմել Սուսաննա Մկրտչյանը:
Դավիթաշեն գյուղից մինչեւ գերեզմանոց հասնելը, բնակիչների խոսքերով՝ հերոսություն է: «Երբ գերեզմանոց այցելելու համար դիմում ենք տաքսի ծառայություններին, տաքսիները կա՛մ հրաժարվում են տեղափոխել, կա՛մ էլ ճանապարհի կեսին իջեցնում են՝ պատճառաբանելով, թե մեքենաները կվնասվեն ու չեն կարողանա վնասը հատուցել»,- պատմեց Սուսաննա Մկրտչյանը: Գերեզմանոցի ճանապարհից բացի, քանդված եւ անբարեկարգ է նաեւ հենց գերեզմանին հարող ճանապարհը:
Այս առնչությամբ Դավիթաշենի թաղապետ Սուրեն Ղուկասյանը «Առավոտի» հետ զրույցում պարզաբանեց, որ գյուղից գերեզմանոց տանող ճանապարհը նորոգելն իրենց գործը չէ. «Այդ ճանապարհը թաղապետարանի ենթակայության տակ չէ: Մայրաքաղաքի գերեզմանոցները քաղաքապետարանի ենթակայության տակ են, ուստի գերեզմանոցների ու այնտեղ տանող ճանապարհների բարեկարգման աշխատանքներն էլ պետք է իրականացնի քաղաքապետարանը»: Թաղապետն էլ էր տեղյակ, թե որքան քարուքանդ է Դավիթաշենի գերեզմանոցի ճանապարհները: Ըստ նրա, այն վերանորոգելը մեծ ծախսերի հետ է կապված: «Թող այդ գերեզմանոցում թաղված հանգուցյալների հարազատները Դավիթաշեն գյուղի ճանապարհով չգնան, մեկ այլ ճանապարհ էլ կա, որը շատ լավ, բարեկարգված վիճակում է, թող այդ կողմով գնան գերեզմանոցներ»,- առաջարկեց պարոն Ղուկասյանը: Մինչդեռ նկատենք, որ թաղապետի նշած այդ այլընտրանքային ճանապարհը շատ երկար է, եւ ճանապարհածախսը կրկնապատկվում է:
Թե ինչու են անտեսել գերեզմանոցի ճանապարհը՝ Երեւանի քաղաքապետարանի առեւտրի եւ սպասարկումների վարչության պետի տեղակալ Ալեքսան Բարսեղյանն «Առավոտին» պարզաբանեց. «Այդ հատվածում անհատները շինարարություն են անում, հիմա անիմաստ է այդտեղ բարեկարգման աշխատանքներ կատարել, քանի որ նորից ամեն ինչ քանդվելու է, անպարտաճանաչ մարդիկ են: Սպասում ենք այդ անհատական շինարարությունների ավարտին ու մենք սկսենք մեր աշխատանքները»: Մեր հարցին՝ եթե այդ անհատական շինարարությունները ձգվեն 3 տարի, այդ ճանապարհը 3 տարի քարուքա՞նդ է մնալու՝ պարոն Բարսեղյանը պատասխանեց. «Մենք պարտավորություն ունենք բարեկարգել այդ տարածքը, ուրեմն կանենք»:
