![\"\"](\"https://www.aravot.am/2007/aravot_arm/September/1/p1.jpg\")
Ճանաչված ամերիկաբնակ գեղանկարիչ, կոլեկցիոներ, Երեւանի Միջին Արեւելքի թանգարանի հիմնադիր, Երեւանի պատվավոր քաղաքացի Մարկոս Գրիգորյանի մահվան կապակցությամբ ստեղծվել է թաղման գերատեսչական հանձնաժողով՝ մշակույթի փոխնախարար Գ. Գյուրջյանի գլխավորությամբ: Մարկոս Գրիգորյանի քաղաքացիական հոգեհանգիստը կկայանա այսօր, Երեւանի Կոմիտասի անվան կամերային երաժշտության տանը, ժամը 12-14-ը: Նույն օրը աճյունը կամփոփվի Երեւանի քաղաքային պանթեոնում: Նախարարության մահախոսականում բարձր է գնահատվել արվեստագետի տաղանդն ու հայրենասիրությունը: Փաստենք, սակայն, որ մշակույթի նախարարությունը «ակտիվանում» է միայն սգո միջոցառումներ կազմակերպելիս, իսկ կենդանության օրոք անգամ մեծանուն արվեստագետները մատնվում են անուշադրության: Նախարարությունը այդպես էլ չդատապարտեց Մ. Գրիգորյանի վրա կատարված ավազակային հարձակումը, «չլսելու» ու «չտեսնելու» տվեց վերջին օրերը հիվանդանոցում անցկացրած մարդու տառապանքները (այս լուսանկարը «Առավոտն» արել է հիվանդանոցում), 15 տարում չլուծեց նրա հիմնադրած Միջին Արեւելքի թանգարանի կարգավիճակի
եւ տարածքի հարցը:
