Հայաստանի ֆուտբոլի ֆեդերացիայից տեղեկացնում են, որ ՀՖՖ նախագահ Ռուբեն Հայրապետյանի հրամանով հանրապետության մինչեւ 21 տարեկանների հավաքականի գլխավոր մարզիչ է նշանակվել Վարուժան Սուքիասյանը: Նախկին գլխավոր մարզիչ Սամվել Պետրոսյանը սեփական դիմումի համաձայն ազատվել է զբաղեցրած պաշտոնից:
Երեկ «Առավոտը» Սամվել Պետրոսյանի հետ հեռախոսազրույց ունեցավ:
– Ֆեդերացիայի մամուլի քարտուղարության տարածած տեղեկատվությունում նշված է, որ դուք եք ցանկացել հավաքականի ղեկը թողնել:
– Այո, դիմում ինքս եմ ներկայացրել:
– Ի՞նչն էր պատճառը:
– Գիտեք, որ հիմա աշխատում եմ Կապանում եւ «Գանձասարի» մարզիչն եմ: Երեւանից կտրված լինելն է հրաժարականիս պատճառը:
– Եվ նախապատվությունը տվեցիք «Գանձասարի՞ն»:
– Այո: Եվ ասեմ, թե ինչու: Հավաքականի մարզիչը պետք է մշտապես գտնվի երկրի ֆուտբոլային իրադարձությունների կենտրոնում, որպեսզի լավագույններին ընտրելու հնարավորություն ունենա: Երբ Երեւանում էի, դա հեշտ էր: Հիմա ֆիզիկապես անհնար է այդ նպատակով թեկուզ շաբաթը մեկ անգամ 6-7 ժամ ճանապարհ կտրել ու ետ վերադառնալ: Բացի դա, այս տարի մեր ակումբին երկրի առաջնությունում 4-րդ տեղի համար պայքարելու հեռանկար է բացվել ու ստեղծված առիթն անտեսելը սխալ կլինի: «Գանձասարը», «Միկան» եւ «Բանանցը» այս պահին 28-ական միավոր ունեն: Պետք է աշխատենք օգտվել ընձեռված հնարավորությունից:
– Այսինքն, դիմում ներկայացնելու այլ պատճառներ չկա՞ն:
– Միանշանակ՝ ոչ:
