ՀՀ ոստիկանության մեր աղբյուրների փոխանցմամբ, օգոստոսի 12-ին, ժամը 02.20-ին, ոստիկանության Կենտրոնականի բաժնում թիվ 3 կլինիկական հիվանդանոցից հաղորդում է ստացվել, որ կրծքավանդակի ձախ եւ աջ մասերում ստացած վնասվածքներով Կորյունի փողոցից իրենց մոտ են տեղափոխվել 1985թ. ծնված Արտակ Ալեքսանյանը՝ թեթեւ մարմնական վնասվածքներով, եւ 1984 թ. ծնված Արթուր Սիմոնյանը, որը հիվանդանոցում մահացել է:
Դեպքի վայր մեկնած օպերատիվ խմբին Արտակ Ալեքսանյանը հայտնել է, որ օգոստոսի 12-ին, ժամը 01.30-ի սահմաններում, Մաշտոցի պողոտայի եւ Կորյունի փողոցի խաչմերուկում գտնվող «Ռելաքս» դիսկոտեկ-ակումբի մոտ տեղի ունեցած վիճաբանության ժամանակ անհայտ անձը սուր-կտրող-ծակող առարկայով հարվածել է իրեն եւ Ա. Սիմոնյանին ու դիմել փախուստի: Փաստի առիթով հարուցվել է քրգործ՝ ՀՀ ՔՕ 104 հոդվածի հատկանիշներով՝ սպանություն: Քննությունը վարում է ՀՀ ոստիկանության Կենտրոնականի բաժնի քննչական բաժինը: Հանգամանքները պարզվում են, կատարվում է նախաքննություն:
«Առավոտի» տեղեկություններով, վիճաբանությունը ծագել է սպանված Ա. Սիմոնյանի եւ ԱԺ պատգամավոր Ալեքսանդր Սարգսյանի կրտսեր որդու, իբր, բանակում ժամկետային ծառայության մեջ գտնվող, բայց փաստացի դիսկոտեկ-ակումբների մշտական հաճախորդ Հայկ Սարգսյանի եւ նրա ընկերների միջեւ, թեեւ ոստիկանության տարածած պաշտոնական հաղորդագրությունում ո՛չ նրա, ո՛չ էլ Ա. Սիմոնյանին սպանած երիտասարդի անունը չի նշվում: Փոխարենը իրավապահները նշել են Ա. Ալեքսանյանի անունը, որը, ըստ մեր աղբյուրների, ընդամենը դեպքի ականատես է եղել եւ հետաքրքրությունից է մոտեցել իմանալու, թե ինչ է կատարվում: Փախուստի մեջ գտնվող երիտասարդը Շենգավիթում բնակվող, 1983թ. ծնված Աշիկ Միսակի Նազարեթյանն է, որին ոստիկանները դեռեւս փնտրում են:
Նշենք, որ սա առաջին դեպքը չէ, որ Սաշիկ Սարգսյանի որդիները մասնակցում են նման միջադեպերի, բայց, բնականաբար, որեւէ պատիժ չեն կրում
