![\"\"](\"https://www.aravot.am/2007/aravot_arm/August/9/p01.jpg\")
80-ամյա ամերիկահայ նկարիչ եւ կոլեկցիոներ Մարկոս Գրիգորյանի վերջին այցը հայրենիք բոլոր իմաստներով անհաջող էր: Նախ՝ նա այդպես էլ չկարողացավ տեղ գտնել Հայաստան բերած իր՝ Միջին Արեւելքի թանգարանի եզակի հավաքածուի համար («Առավոտ», 03.08.07): Իսկ երկու օր առաջ նա ավազակային եւ շատ դաժան հարձակման էր ենթարկվել, որի մասին տեղեկացրել ենք երեկվա համարում: Երեկ հայտնի դարձավ, որ պարոն Գրիգորյանը ենթարկվել էր վիրահատության. բժիշկները նրա գլխին 8 կար են դրել եւ մեկ կար՝ շուրթերին: Հիշեցնենք, որ նախորդ օրը երկու դիմակավորված անձինք գիշերվա ժ. 2-ին մուտք էին գործել Զուրաբյան փողոցում գտնվող նրա բնակարանը, կապել էին նրան աթոռին եւ դաժանաբար ծեծել: Նկարչից գողացել էին ոչ միայն այդ պահին գտնված 400 դոլարը, այլեւ ԱՄՆ մեկնելու տոմսը (պիտի մեկներ հոկտեմբերին), բանկային քարտերը: Մ. Գրիգորյանի վրա ավազակային հարձակման մասին տեղյակ է պահվել հանրապետության նախագահին եւ ոստիկանապետին:
