Երեկ ԱԺ նախագահ Տիգրան Թորոսյանն ընդունել է ԱՄՆ պետքարտուղարի օգնականի տեղակալ, ԵԱՀԿ Մինսկի խմբի համանախագահ Մեթյու Բրայզային:
ԱԺ հասարակայնության հետ կապերի վարչության հաղորդագրության համաձայն՝ պարոն Բրայզան շնորհավորել է ԱԺ նախագահին՝ «խորհրդարանական ընտրություններն ազատ, արդար անցկացնելու համար»:
Իսկ Տիգրան Թորոսյանը նշել է, որ «սահմանադրական բարեփոխումների ընդունումից հետո Հայաստանում էական փոփոխություններ են տեղի ունեցել ժողովրդավարության, մարդու իրավունքների պաշտպանության, օրենքի գերակայության հաստատման առումով: ԱԺ նախագահն ափսոսանք հայտնեց, որ ընդդիմությունը ժամանակին չկարողացավ գնահատել այդ շատ կարեւոր գործընթացի նշանակությունը՝ բոյկոտելով քննարկումները, եւ հետագայում էլ լրջորեն չուսումնասիրվեց, թե խորհրդարանական ընտրություններից հետո քաղաքական ինչ իրավիճակ է ստեղծվելու սահմանադրական փոփոխությունների հետեւանքով»: ԱԺ նախագահը նշել է, որ «ընդդիմության թուլությունը խնդիր է նաեւ իշխանության համար, որովհետեւ բազմակուսակցական համակարգում մի կողմի թուլությունը չի կարող չանդրադառնալ մյուս կողմի վրա: Այս առումով կարեւորվեց բազմակուսակցական համակարգի կայացումը՝ ԱԺ աշխատակազմի որակական բարելավմամբ օգնելով խորհրդարանական կուսակցությունների աշխատանքին»: Նշվել է, որ Հայաստանում ԱՄՆ գործերի ժամանակավոր հավատարմատար Ռուդոլֆ Փերինան արդեն ներկայացրել է խորհրդարանի հետ համագործակցության նախնական ծրագիրը, որը սեպտեմբերին կքննարկվի:
Անդրադառնալով նախագահական ընտրություններին՝ ԱԺ նախագահ Տիգրան Թորոսյանը նշել է, որ «լավ աշխատանքի դեպքում ՀՀԿ-ն մեծ դժվարություններ չի ունենա այդ ընտրություններում իր թեկնածուի հաղթանակի համար»:
Հանդիպման ընթացքում անդրադարձ է եղել նաեւ «Ազատություն» ռադիոկայանի հեռարձակման խնդրին. պարոն Բրայզան նշել է, որ իրեն տրամադրված տեղեկատվության համաձայն՝ շատ հարցեր պարզաբանվեցին, «ու թեեւ «Ազատությունը» նախընտրում է Հանրային ռադիոընկերությունը, բայց կարեւորը հեռարձակման հնարավորություն ունենալն է, եթե ժամային սահմանափակումներ չլինեն եւ առեւտրային խնդիրներ չառաջանան»: ԱԺ նախագահ Տիգրան Թորոսյանն էլ հույս է հայտնել, որ բանակցությունները հաջողությամբ կավարտվեն, եւ «գտնված տեխնիկական լուծումը քաղաքական արձագանքների տեղիք չի տա»:
