![\"\"](\"https://www.aravot.am/2007/aravot_arm/June/23/p14.jpg\")
Նիստի առաջին օրը գործկոմի անդամները Հայաստան-Ադրբեջան հանդիպմանը անդրադառնալու ժամանակ չունեցան:
Երեկ Հոլանդիայի Հերենվեն քաղաքում սկսվեց Ֆուտբոլային ասոցիացիաների եվրոպական միության (ՈՒԵՖԱ) գործադիր կոմիտեի հերթական նիստը, որտեղ, ըստ այդ կազմակերպության ղեկավար պաշտոնյաների հավաստիացումների, վերջնական որոշում է կայացվելու նաեւ Եվրոպայի 2008 թվականի առաջնության խմբային մրցաշարի՝ 2007 թվականի սեպտեմբերի 8-ին եւ 12-ին կայանալիք Հայաստան-Ադրբեջան ազգային հավաքականների հանդիպումների անցկացման վայրի ընտրության մասին:
«Առավոտի» տեղեկություններով, այն գործկոմի օրակարգային առաջնային հարցերի ցանկ մտցված չէր, սակայն անպայման պետք է քննարկվեր «Այլ հարցեր» բաժնում: Գործկոմի անդամները խնդրի շուրջ պետք է արտահայտեին իրենց տեսակետները, իսկ վերջնական վճիռ կայացվելու էր դրանից հետո եւ արդյունքների մասին հայտարարվեր այսօր օրվա երկրորդ կեսին՝ նիստի աշխատանքների ավարտին նախատեսված մամուլի ասուլիսում: Այս մասին տեղեկացնում են նաեւ Ադրբեջանի զանգվածային լրատվամիջոցները:
ՈՒԵՖԱ-ի մամուլի քարտուղար Ուիլյամ Գալյարդի խոսքերով, Հայաստանի եւ Ադրբեջանի ազգային ֆեդերացիաների ներկայացուցիչները խնդրի քննարկմանը չեն հրավիրվել: Սակայն որոշումը նրանց ուղարկվելու է հենց կայացման օրը: Այդուհանդերձ, Եվրոպայի ֆուտբոլային ղեկավար գերատեսչական մարմինն ինչպե՞ս կկողմնորոշվի: Տարբերակները շատ են:
Ա. Հանդիպումները, ինչպես պահանջում են ՖԻՖԱ-ի եւ ՈՒԵՖԱ-ի կանոնադրությունները, անցկացնել Բաքվում եւ Երեւանում՝ կողմերին պարտադրելով ապահովել պատվիրակությունների բոլոր անդամների անվտանգությունը (Հայաստանն այդ հարցում խնդիրներ չունի), պահպանելով միջազգային մրցումների անցկացման ընդունված նորմերը: Իսկ պահանջը կատարելուց հրաժարվող երկրի հավաքականին գրանցել տեխնիկական պարտություն:
Բ. Բաքվում նշանակված առաջին հանդիպումն անցկացնել չեզոք երկրում, իսկ պատասխան խաղը՝ Երեւանում:
Գ. Երկու հանդիպումներն էլ անցկացնել չեզոք դաշտերում (այս տարբերակին հայկական կողմը դեմ է):
Սակայն պարզվում է, որ կարող է լինել նաեւ մեկ այլ տարբերակ: Ուիլյամ Գալյարդը հայտարարել է, թե հնարավոր է նաեւ, որ ՈՒԵՖԱ-ն ընդհանրապես հրաժարվի Հայաստանի եւ Ադրբեջանի ազգային հավաքականների միջեւ հանդիպումներն անցկացնելուց: «Դրա համար կարեւոր է երկու կողմերի պայմանավորվածությունը,- ասել է նա:- ՈՒԵՖԱ-ի կանոնադրությունը նման բան նախատեսում է: Այնպես որ, գործադիր կոմիտեի նիստում հնարավոր է ցանկացած որոշում»:
