![\"\"](\"https://www.aravot.am/2007/aravot_arm/June/20/p1.jpg\")
Հունիսի 18-ին նախագահական հերթական մրցանակները հանձնվեցին գիտության, մշակույթի եւ այլ ոլորտների ներկայացուցիչներին: Ընդ որում, մրցանակ բառը մեդալների վրա գրված էր ձ-ով: Տառասխալը ոչ թե սովորական գրագրության, այլ երկրի բարձրագույն պարգեւի վրա է դրոշմված: ՀՀ նախագահի աշխատակազմի, հասարակայնության եւ տեղեկատվության միջոցների հետ կապերի վարչության պետի տեղակալ Իրինա Ղուլինյանն «Առավոտին» փոխանցեց, որ մեդալների պատրաստմամբ «Հայաստան» հիմնադրամն է զբաղվում, ուստի նախագահականը դրանում մեղավոր չէ: Հիմնադրամից էլ Հասմիկ Գրիգորյանն ասաց, որ ցավում են կատարվածի համար, եւ հավաստիացրեց, որ առաջիկայում ավելի ուշադիր կլինեն՝ տառասխալներով մեդալների «լույս աշխարհ» գալը կանխելու համար: Կապվեցինք նաեւ մրցանակակիրներից ոմանց հետ: Օրինակ՝ գրող, ՀՅԴ անդամ Ռուբեն Հովսեփյանը (լուսանկարում ստանում է տառասխալով մեդալը) ասաց, որ չի նկատել իր մեդալի թերությունը՝ խոստանալով տուն հասնելուն պես այն տեղը տեղին ուսումնասիրել: Իսկ լավագույն լուսանկարների համար պարգեւատրված Անահիտ Հայրապետյանը հայտնեց, որ չարաբաստիկ ձ-ն նկատել էր առաջին
իսկ պահից ու տխրել:
