ՀՆԴԻԿ ԴԵՍՊԱՆԸ ԼԱՎԱՏԵՍ Է

Նա հույս ունի, որ մի օր, հնդկական ֆիլմերից ու «Ջիպ» մեքենաներից բացի, հայերը հնդկական այլ ապրանքներ էլ կներկրեն եւ երկու երկրների ապրանքաշրջանառությունը կընդլայնվի:

Հայաստանում Հնդկաստանի դեսպան Րինա Պանդեյը հիացած է մեր երկրի տնտեսական աճով: Նա մեկուկես տարի է, ինչ Հայաստանում է եւ զգացել է, որ մեր տնտեսությունը «նորմալ զարգանում է»: Թե ինչով է պայմանավորված դեսպանի հիացմունքը՝ «Առավոտի» հետ զրույցում նա այսպես բացատրեց. «Նկատել եմ, որ ձեր կառավարությունը մեծ ուշադրություն է դարձնում փոքր ու միջին ձեռնարկություններին, քանի որ դրանք առաջին հերթին ապահովում են աշխատատեղեր: Այս կարճ ժամանակահատվածում, երբ հարեւան երկու պետությունների հետ սահմանները փակ են, ինչի էլ որ հասել եք՝ մեծ հաջողություն է: Հայաստանը զարգանում է ոչ միայն տնտեսապես, այլեւ արտաքին քաղաքականությամբ: Իմ պաշտոնավարման 15 ամիսների ընթացքում այստեղ բացվել են 3 նոր դեսպանատներ՝ Բրազիլիայինը, Լիտվայինը եւ Ղազախստանինը: Սա ցույց է տալիս, որ Հայաստանը աշխարհի քարտեզի վրա զարգանում է՝ որպես անկախ ու ժողովրդավարական պետություն»:

Հայաստանի եւ Հնդկաստանի միջեւ ապրանքաշրջանառությունը շատ քիչ է: Այնուամենայնիվ, տարեցտարի առեւտրաշրջանառության աճ լինում է: Օրինակ, 2003-ին երկկողմ առեւտուրը կազմել է 6 մլն դոլար, իսկ 2006-ին՝ 20 մլն: Ըստ տիկին Պանդեյի, եթե ճանապարհների խնդիրը չլինի՝ ավելի լավ ցուցանիշներ կարձանագրվեն, իսկ որպեսզի տուրիզմը զարգանա, պետք է Հայաստան Հնդկաստան ուղիղ չվերթ բացվի, ինչն առայժմ չկա: Հնդկաստանի դեսպանը նկատել է, որ մեր երկրում «Սկորպիո» մակնիշի հնդկական «Ջիպ» մեքենաներ շատ են վարում: Ըստ նրա, Հնդկաստանում էլ շատ հավանում են հատկապես հայ վարպետների մշակած ադամանդը:

Հնդիկ մեծահարուստ Անիլ Ագարվալին պատկանող «Արարատ ոսկու արդյունահանման ձեռնարկության» եւ բնապահպանության նախարար Վարդան Այվազյանի միջեւ արդեն 1 տարուց ավելի է՝ մեծ վեճեր են լինում, քանի որ վերջինս հնդիկ գործարարին մեղադրում է կառավարությունից ոսկի թաքցնելու մեջ: Հնդկաստանի դեսպանը դեռեւս չի պատրաստվում խառնվել նրանց խնդիրներին: Դեսպանի խոսքերով՝ «դա մասնավոր գործ է եւ հնդիկ բիզնեսմենը համագործակցում է ՀՀ կառավարության հետ: Մենք հետեւում ենք, թե գործն ինչպես է զարգանում, ուզում ենք վստահ լինել, որ նրա հանդեպ խտրականություն չի դրսեւորվում: Երբ զգանք, որ ոտնահարվում է հնդիկ գործարարի իրավունքները՝ կմիջամտենք»:

Չնայած ՀՀ կառավարությունն այդ ձեռնարկության հնդիկ բիզնեսմենների վրա անընդհատ ճնշումներ է գործադրում եւ պարբերաբար ընկերությունում ստուգումներ է անցկացնում՝ տուգանելու ակնկալիքով, այդուհանդերձ, դա դեսպանի վերաբերմունքը չի փոխում մեր իշխանությունների նկատմամբ: Հայաստանում Րինա Պանդեյն իրեն հրաշալի է զգում: Մեր երկրում նա հավանել է ամեն ինչ, միայն դեռ չի կարողանում հաշտվել ձյան տեղումների հետ: Տիկին Պանդեյն ասում է, որ ինքը շատ մարդամոտ է: Նա եղել է դեսպանատան գրեթե բոլոր հայ աշխատակիցների բնակարաններում ու հիացել է նրանց առատ սեղաններով. «Եղել եմ իմ տան աշխատողի բնակարանում, Ամանորի եւ Սուրբ ծննդի տոներին էլ այցելել եմ վարորդիս տուն, ինձ դուր է գալիս մարդկանց ջերմ վերաբերմունքը եւ իրար օգնելու պատրաստակամությունը: Եթե տրամադրությունս լավ է լինում, կարող է չնախատեսված գնամ Խոր Վիրապ: Շատ եմ սիրում նաեւ Արագած լեռը եւ հաճախ իմ 80 տարեկան մայրիկի հետ գնում եմ այնտեղ՝ ծաղիկ հավաքելու: Ես հինգ աստղանի հյուրանոցների փոխարեն նախընտրում եմ քյաբաբ ու խաչապուրի համտեսել հենց Օպերայի շրջակայքի բացօթյա սրճարաններում»: Ի դեպ, տիկին դեսպանը հաճույքով ընդունեց նաեւ իմ հրավերը՝ այցելելու մեր տուն:

Րինա Պանդեյը հայկական կերակուրներից նախընտրում է խորոված իշխան ձուկը՝ թարխունով, սիրում է նաեւ խորովածը եւ հայկական աղցանները: Դեսպանը որոշել է, որ այս տարի ինքն անձամբ է մուրաբաներ պատրաստելու, սակայն խոստովանում է, որ չի համարձակվի իր պատրաստածն առաջինն ինքն ուտել, քանի որ, նրա խոսքերով՝ «վատ խոհարար եմ»:

Տիկին Պանդեյը հետաքրքրված է հայկական մշակութային կյանքով: Նա մասնակցում է երաժշտական փառատոների, պարի համույթների կողմից կազմակերպվող միջոցառումներին. «Հայաստանում սիրեցի օպերան, որով մինչ այդ երբեք չեմ հետաքրքրվել: Շատ հավանեցի «Անուշը» եւ «Գայանե» բալետը: Երկուսն էլ մի անգամ եմ տեսել եւ սպասում եմ, թե երբ են էլի բեմադրելու, որ նորից հաճախեմ: Ինձ դուր են եկել նաեւ Միշա Մայսկու թավջութակի կատարումները եւ «Բարեկամություն» պարային համույթը»: