«Է՞Ս ԷԻՔ ՈՒԶՈՒՄ՝ ԸՆՏՐԵՑԻՆՔ, ՀԵՏՈ՞»

Երեկ իր քաղաքացիական պարտքը կատարելուց հետո դուրս գալով ընտրատեղամասից՝ ասաց մի շարքային ընտրող

Խորհրդարանական ընտրությունների թիվ մեկ առանձնահատկությունը մարդկանց ակտիվությունն էր, հիմնականում ընտրողներին ընտրատեղամասեր էին բերում շենք-շենք, երթուղային տաքսիներով: Քաղաքում կյանքը կարծես կանգ էր առել, եւ բոլորը զբաղված էին ընտրություններով: Այնուամենայնիվ, ակնհայտ էր, որ ընտրողների մասնակցության այդքան մեծ թիվը անակնկալ էր մի շարք կուսակցությունների համար, ովքեր այլ հաշվարկներ էին արել: Թիվ 30 երթուղային տաքսիները, խախտելով «Ընտրական օրենսգրքի» պահանջը, որում ասվում է, որ ընտրության օրը չի կարելի զբաղվել քարոզչությամբ, երթուղի էին դուրս եկել ԲՀԿ-ի քարոզչական թերթիկները ապակիներին փակցրած, ինչը չկար նախորդ երկու օրերին:

Ընտրատեղամասերում հերթեր էին, եւ տպավորությունն այնպիսին էր, որ այդ հերթերը եւս հատուկ նպատակով էին առաջացրել: Հատկապես ակտիվ եւ համարձակ էին գործում Դաշնակցության եւ «Օրինաց երկրի» հանձնաժողովների անդամներն ու վստահված անձինք: ՀՀԿ-ի եւ ԲՀԿ-ի անդամներն ու վստահված անձինք հիմնականում զբաղված էին ընտրատեղամասերի մոտ խմբված տղաների եւ կողմնակի անձանց հետ ինչ-ինչ խոսակցություններով եւ թաքուն զրույցներով: Այս երկու կուսակցությունների գրեթե բոլոր շտաբների մոտ մեքենաների ցուցահանդես էր՝ ամեն տեսակի մեքենաներ կային՝ «համմերներ», «ջիպեր», «մերսեդեսներ», մի խոսքով՝ ընտրատեղամասերը նմանվել էին մեծ ավտոշուկաների:

Ընտրախախտումներ՝ ըստ ՀԺԿ-ի

ՀԺԿ գրասենյակում առավոտից աշխատում էր թեժ գիծը, ամեն րոպե հնչում էին հեռախոսազանգեր: Այստեղ շարունակ տեղեկություններ էին գալիս, որ ՀՀԿ-ն, ԲՀԿ-ն եւ ՄԱԿ-ը «փող են բաժանում»: Կուսակցության գրասենյակում գտնվող «Ազգային վերածնունդ» կուսակցության նախագահ Ալբերտ Բազեյանը նկատեց, որ «փող բաժանելու» նման գործընթացն ուղղակի աննախադեպ է:

ՀԺԿ-ականների կողմից գրանցված մի քանի խախտումների մասին.

Արաբկիրի թիվ 4/22 ընտրատեղամասում ընտրողներին քվեարկության են բերում թիվ 17 երթուղային տաքսիներով:

ՀԺԿ նախընտրական շտաբն ահազանգ է ստացել քաղաքացիներից այն մասին, որ մայիսի 12-ի գիշերվա ժամը 3-ին «Զվարթնոց» օդանավակայանում անցկացվել է քվեարկություն:

Ըստ թիվ 88 երթուղային տաքսիներից մեկի վարորդի, այդ երթուղում այսօր աշխատելու է մի քանի մեքենա, մնացածը ներգրավված է ընտրողներին տեղամաս հասցնելու գործընթացին:

Նորք-Մարաշում գտնվող թիվ 10/06 ընտրատեղամասում ընտրողներին քվեարկության են բերում երթուղային տաքսիներով՝ ԱՄ-07-619, 64-ՕՍ 905, ԱՄ 07-655/(թիվ 121 երթուղային):

Գեղարքունիքի մարզի Ծովակ գյուղում անցկացվում է բաց քվեարկություն ՀՀԿ-ի օգտին:

Քանաքեռ-Զեյթունի թիվ 3 ընտրատարածքում ՀՀԿ նախընտրական շտաբի աշխատակիցները առավոտվանից այցելում են բարձրահարկ շենքերի բնակիչներին եւ բաժանում 5000-ական դրամ:

Թիվ 212 մանկապարտեզում՝ Բ-2 թաղամաս, ընտրողների կուտակումներ են առաջացել:

Ժամը 17-ի տվյալներով՝ 12/17 տեղամասի մոտ խմբված են մարդիկ. համատիրության աշխատակիցները բաժանում են 5000-ական դրամ եւ պահանջում քվեարկել հօգուտ ՀՀԿ-ի:

3/28 ընտրատեղամասում՝ Զվարթնոցի մոտի մանկապարտեզում, երթուղային տաքսիներով բերում են քվեարկության մարդկանց, որոնք այդ թաղում չեն բնակվում: Նրանք նոր ստացած անձնագրերով են: Ըստ ՀԺԿ շտաբ դիմած քաղաքացու, նրանց տրվել են անձնագրեր քաղաքից բացակայող բնակիչների անուններով:

Վստահություն չեն ներշնչում ՀՀ ոստիկանության հավաստիացումները առ այն, որ ընտրացուցակները հնարավորինս ճշգրտված են: Բողոքների թիվը վկայում է, որ ընտրողներին ուղղված կոչերը՝ ակտիվ մասնակցել այդ գործընթացին 56-13-46 թեժ գծի միջոցով, կրում են ձեւական բնույթ:

Թիվ 10/31 ընտրատեղամասի ցուցակներում ընդգրկված նախկին միլիցիայի գնդապետ, 10 տարի առաջ մահացած Կառլոս Հայկի Խաչատրյանի այրին տեղեկացրեց, որ օրեր առաջ հայտնել է դրա մասին ոստիկանության թեժ գծով: Այսօր, երբ եկել է տեղամաս՝ քվեարկելու, ամուսնու անունը դարձյալ եղել է ցուցակում: Ըստ դիմողի, այդպիսի դեպքերը բազմաթիվ են 10/31 ընտրատեղամասում՝ Անտառային փողոցի բազմաթիվ նախկին բնակիչներ, որոնք տարիներ առաջ վաճառել են բնակարանները, ընդգրկված են ընտրացուցակներում:

«Ազգային Միաբանություն»

Այստեղ, ժամը 15.00-ի սահմաններում, ասացին, որ առայժմ ոչ մի ակնառու խախտում իրենց կողմից չի արձանագրվել: Շտաբում սպասում էին ընտրությունների օրվա ավարտին: Իսկ տեղեկությունները, որ Երեւանի թիվ 4 ընտրատարածքի տեղամասերից մեկում ԱՄ անդամ հանձնաժողովի քարտուղարը գողացել է գրանցամատյանը եւ հեռացել, կուսակցության գրասենյակում հերքեցին, ասելով, որ իրենց անդամը ուղղակի փորձել է այդպիսով խոչընդոտել ընտրախախտումը:

Արտաշես Գեղամյանը երեկ, արդեն օրվա վերջում՝ ժամը 21-50-ի սահմաններում, մեզ տեղեկացրեց հետեւյալը. «Բոլոր տեղերից ինֆորմացիա ենք ստացել, որ վերաբերմունքը մեր հանդեպ բավականին լավ է, եւ մենք սպասում ենք լավ նորությունների»:

«Բարգավաճ Հայաստան» կուսակցություն

«Ընթացքը գնահատում ենք նորմալ, ունենք ահազանգեր տեղական խախտումների մասին, կճշտենք եւ լրացուցիչ կտեղեկացնենք»,- օրվա ավարտին մեզ փոխանցեց ԲՀԿ մամուլի քարտուղար Բաղդասար Մհերյանը:

Դաշնակցության

տեղեկությունները

Քվեարկողների վկայությամբ՝ երեկ, կեսօրին, Քանաքեռի թիվ 3/01 ընտրատեղամասում ընտրախախտում է գրանցվել. քվեարկողներին են տրվել նշումներով քվեաթերթիկներ: Դեպքի մասին թիվ 3 ընտրատարածքային հանձնաժողով են դիմել ՀՅԴ վստահված անձինք: Հանձնաժողովի նախագահը ասել է, որ այդ նշումները պատահաբար են արվել, իսկ վստահված անձինք հավատացած են, որ միանգամից մի քանի տասնյակ քվեաթերթիկներում «պատահաբար» նման բան չէր կարող լինել:

Այլ ընտրախախտումների մասին ՀՅԴ-ն կտեղեկացնի ավելի ուշ՝ դրանք ճշտելուց հետո:

Ահազանգերի հետքերով

Երեկ, ժամը 18-ի սահմաններում, մենք ահազանգ ստացանք, որ Դավիթաշենի թիվ 5 ընտրատարածքի 5/14 ընտրատեղամասում արտակարգ իրավիճակ է, եւ հանձնաժողովի նախագահը կամայականություններով է զբաղված: Տեղում պարզեցինք, որ հանձնաժողովի անդամ, ՕԵԿ-ական Անահիտ Դարբինյանը մեզ տեղեկացրեց, որ ընտրողների մեծ մասը եկել էր քվեարկելու Երաժշտական դպրոցի շենքում, այն դեպքում, երբ տեղի է ունեցել ընտրատեղամասերի թվերի փոփոխություն, եւ ընտրողներին տեղյակ չի պահվել, իսկ ոստիկանությունը բնակիչներին հիշեցումներ է ուղարկել հին հասցեներով:

Բավականին մեծ թվով ընտրողներ եկել էին 5/14 ընտրատեղամաս, եւ հասկանալի է, որ նույնն էլ կատարվել է մյուս ընտրատեղամասում: Բացի դրանից, մեկ ընտրող ներկայացել է որպես թիվ 36 շենքի բնակիչ, եւ երբ հանձնաժողովի ՕԵԿ-ական անդամը ճանաչել է, որ տվյալ անձը այդ շենքի բնակիչ չէ եւ պահանջել է նրա անձնագիրը, այդ մարդը դիմել է փախուստի: Այս ընտրատեղամասում հանձնաժողովի նախագահ Ժորա Ղուկասյանը ներկայացավ որպես Կոմկուսի ներկայացուցիչ:

Ի դեպ, մեր այցելած գրեթե բոլոր ընտրատեղամասերում հանձնաժողովների անդամները, վստահված անձինք եւ դիտորդները իրենց բավականին ճնշված ու խեղճ էին զգում եւ միակ «տերուտիրականը» հանձնաժողովների նախագահներն ու նրանց տեղակալներն էին:

Երեկ միջադեպ էր տեղի ունեցել նաեւ 5/16 ընտրատեղամասում (թիվ 196 դպրոց): Մեզ ահազանգեցին, որ այստեղ են ներխուժել երկու զինված տղաներ եւ վախեցրել հանձնաժողովականներին, ստիպելով, որ ձայն չհանեն՝ մինչեւ իրենց բերած մարդիկ իրենց ուզած ձեւով կքվեարկեն եւ կհեռանան: Մենք անմիջապես գնացինք ընտրատեղամաս, սակայն ականատեսները այլ բան պատմեցին եւ հերքեցին ատրճանակով մարդկանց մասին լուրերը: Հանձնաժողովի աշխատանքը լուսաբանող «Պանարամա» էլեկտրոնային թերթի լրագրողի աշխատանքը փորձել է խանգարել մեծամասնականով առաջադրված Լեւոն Սարգսյանի վստահված անձը: Ի դեպ, լրագրողը նկատել է, որ հատկապես այս թեկնածուն ինչ-որ տարօրինակ մեծ թվով վստահված անձինք ունի այս տեղամասում, եւ նրանք բոլորն էլ ազատ ելումուտ են անում ընտրատեղամասում: Ժամը 15-ի սահմաններում երթուղային տաքսիներով մարդկանց բերել են ընտրատեղամաս, լրագրողը նկարել է այդ տեսարանը, ինչ-որ մեկին դուր չի եկել, որ նկարում են, եւ ձեռքով փակել է ֆոտոխցիկը: Լրագրողի ներկայացմամբ՝ դա Դավիթաշենի 4-րդ թաղամասի համատիրության ղեկավարն է՝ ՀՀԿ անդամ, անունը՝ Արմեն: Նույն ընտրատեղամասում մի տարեց պապիկի քվեարկելու համար ընտրատեղամաս է բերել նրա որդին եւ քվեախցիկում օգնել հորը, որ վերջինս քվեարկի: Այս տեսարանը եւս լրագրողը փորձել է լուսանկարել, նրան է մոտեցել ոմն Նազարյան, բռնել թեւից եւ դուրս հրավիրել, ասելով, որ նա լուսանկարելու իրավունք չունի: Հիշեցնենք՝ ԸՕ-ի հոդված 30-ը նշում է, որ ընտրատեղամասում դիտորդի եւ լրատվամիջոցի ներկայացուցչի իրավունքների որեւէ սահմանափակում չի թույլատրվում: