Հելսինկյան քաղաքացիական ասամբլեայի Վանաձորի գրասենյակը տեղեկանք է հրապարակել իրենց դիտարկման արդյունքների վերաբերյալ:
Ներկայացնում ենք որոշ մանրամասներ Արթուր Սաքունցի ղեկավարությամբ գործող այդ գրասենյակի տեղեկանքից՝ թիվ 30 ընտրատարածքում արձանագրված խախտումների վերաբերյալ:
«Բարգավաճ Հայաստան» կուսակցությունը Գրիգոր Լուսավորչի 39/1 հասցեի բնակիչների համար կազմակերպել է անվճար իրավաբանական խորհրդատվություն (արգելվում է «Ընտրական օրենսգրքի» 18-րդ հոդվածի 7-րդ կետով):
ՀՅԴ պաստառները փողոցում բաժանել են անչափահաս երեխաները (արգելվում է «Գովազդի մասին» օրենքի 14 հոդ. 3-րդ կետով):
ԲՀԿ-ն Տարոն 2 հասցեում տեղակայված նախընտրական շտաբից 2 ընտանիքի տալիս է 1 մեծ պարկ ալյուր: Շտաբի ղեկավարը յուրաքանչյուր ընտանիքին 5 կգ է տվել (արգելվում է «Ընտրական օրենսգրքի» 18-րդ հոդվածի 7-րդ կետով):
ՀՀԿ ներկայացուցիչներն առաջարկում են 5000 դրամ 1 ձայնի դիմաց (արգելվում է «Ընտրական օրենսգրքի» 18-րդ հոդվածի 7-րդ կետով):
ՄԱԿ-ի գրասենյակում քաղաքացիների կողմից սոցիալական հարցերի լուծման համար դիմում-խնդրանքներ են հավաքում (արգելվում է «Ընտրական օրենսգրքի» 18-րդ հոդվածի 7-րդ կետով):
Գազի գրասենյակի աշխատակիցներին կարգադրել են ստորագրություններ հավաքել Հանրապետական կուսակցության օգտին: Յուրաքանչյուր աշխատող պետք է ներկայացնի 10 ստորագրություն եւ անձնագրի տվյալներ:
Վանաձորի քաղաքապետ Սամվել Դարբինյանը հանդիպել է թիվ 15 մանկապարտեզի ծնողների հետ եւ խնդրել ընտրել ՀՀԿ-ին (արգելվում է «Ընտրական օրենսգրքի» 18-րդ հոդվածի 4-րդ կետով):
«Գուգարք» պոլիկլինիկայում Լոռու մարզպետը հանդիպում է կազմակերպել աշխատակիցների հետ՝ հորդորելով քվեարկել ՀՀԿ-ի օգտին (արգելվում է «Ընտրական օրենսգրքի» 18-րդ հոդվածի 4-րդ կետով):
ԲՀԿ ներկայացուցիչները Տարոն 2 թաղամասի բնակարաններ են բերել ինչ-որ ծրարներ եւ կուսակցության կնիքով փաստաթղթի վրա լրացրել են ընտանիքի անդամների անձնական տվյալները:
ՀՅԴ Աղայան փողոցի նախընտրական շտաբներից բնակիչներին 5000 դրամ նախընտրական կաշառք են բաժանում (արգելվում է «Ընտրական օրենսգրքի» 18-րդ հոդվածի 7-րդ կետով):
Ոչ պաշտոնական տվյալներով՝ ԲՀԿ-ն յուրաքանչյուր աշխատողի՝ ստորագրությունների հավաքման համար, վճարում է 15.000 դրամ:
Ոչ պաշտոնական տվյալներով՝ ՄԱԿ-ը 25000 դրամ է վճարում իր նախընտրական շտաբներում աշխատողներին, որոնք պաշտոնապես գրանցված չեն:
Հովհ. Աբելյանի անվան թատրոնում Հանրապետական կուսակցությունը եւ Վանաձորի պետական մանկավարժական ինստիտուտի ռեկտոր Գուրգեն Խաչատրյանը հրավիրել են «Կոմիտասի անվան քառյակին»: Համերգից հետո նախընտրական քարոզչությամբ հանդես է եկել Վահրամ Բաղդասարյանը:
Պատգամավորության թեկնածու Վիկտոր Դալլաքյանը «Մխիթար-Գոշ» հայ-ռուսական միջազգային համալսարանում կայացած հանդիպմանն արգելել է մասնակցել լրագրողներին («ԶԼՄ մասին» օրենքի 4-րդ հոդվածի, 3-րդ կետի, 4-րդ մասի խախտում):
Տարբեր թաղամասերի քաղաքացիների կողմից տրված տեղեկատվությամբ, Վահրամ Բաղդասարյանի նախընտրական շտաբներին քաղաքացիները ներկայացնում են սոցիալական տարբեր տեսակի խնդիրների լուծման կապակցությամբ դիմումներ:
