«Ժողովրդավարություն եւ աշխատանք» կուսակցության ապրիլի 20-ի համագումարի ընթացքում կուսակցության նախագահ Սպարտակ Մելիքյանը հայտարարեց, թե ողջունում են Հայաստանի Հանրապետական կուսակցության որոշումը՝ բացարձակ մեծամասնություն կազմելու վերաբերյալ: ՀՀԿ խմբակցության ղեկավար Գալուստ Սահակյանը, սակայն, բացարձակ մեծամասնություն կազմելու մասին ապրիլի 12-ի ասուլիսում խոսելով՝ ընդգծել էր, թե դա զուտ իր անձնական կարծիքն է:
Այժմ «Առավոտի» հարցին, թե ՀՀԿ խորհուրդն արդեն ընդունե՞լ է համահունչ որոշում՝ Գալուստ Սահակյանը պատասխանեց. «Այս օրերին ինչ որ ես ասում եմ՝ հետագայում քննարկվում է: Եվ ուրախ եմ, որ իմ այդ հայտարարությունը ՀՀԿ խորհուրդը համարեց ողջունելի»:
Բացառությամբ Մալաթիա-Սեբաստիա համայնքում տեղի ունեցած հանդիպման՝ ՀՀԿ խորհրդի ղեկավար Սերժ Սարգսյանը միայնակ է գնում քարոզչական հանդիպումների: Գալուստ Սահակյանից հետաքրքրվեցինք՝ այդպես էլ շարունակվելո՞ւ է. «Կուսակցության նախագահի այցերը կապված են մի հանգամանքի հետ, որ հանրությունն ավելի տեղյակ լինի, եւ նորից վերահաստատվեն այն գաղափարախոսությունը, սկզբունքները եւ ծրագրերը, որոնք ունի Հանրապետականը: Քարոզչության ձեւը, ինչպես նախապես ասել էի՝ ոտքով, ճեմելով, ժողովրդի հետ խորհրդակցելով (այստեղ նրան ընդհատեցինք՝ հիշեցնելով, թե նաեւ գյուղերում մածուն ուտելու մասին էր ասում.- Ա. Ի.): Ինչո՞ւ չէ: Նաեւ ասել եմ, որ մեր ժողովուրդն առատաձեռն ու հյուրասեր է: Եվ այսօր Հայաստանի բոլոր գյուղերում աշխատում են մեր ներկայացուցիչները: Բացի այդ՝ կարծում եմ, մենք մեր ասելիքն արդեն վեց-յոթ տարի է՝ ասել ենք, նաեւ՝ աշխատանքի արդյունքներով: Եվ նույնիսկ զանգվածային լրատվամիջոցներով մեր ներկայանալի դառնալն այսօր թողել ենք հենց լրատվամիջոցներին»:
