![\"\"](\"https://www.aravot.am/2007/aravot_arm/April/19/p6.jpg\")
Ասում է ՆԺ կուսակցության երիտթեւի նախկին ղեկավար, «Օրենքի ուժ» կազմակերպության նախագահ Նարեկ Մալյանը
– Ինչո՞ւ ԱԺ ընտրությունների նախաշեմին հեռացաք կուսակցությունից: Գուցե իշխանության կողմից եղան սպառնալիքներ կամ խոստումնե՞ր:
– Իշխանության կամ որեւէ մեկի կողմից իմ առջեւ պահանջ կամ սպառնալիք չի եղել, առավել եւս՝ խոստումներ եւ գործարքներ: Իսկ թե ինչու հեռացա՝ այդ մասին առայժմ չեմ ուզում խոսել, կխոսեմ ընտրություններից հետո:
Կարճ ասած՝ ես աբիժնիկ չեմ եւ իմ հարաբերությունները կուսակցության հետ մնում են նույնը, դեռ ավելին, ես իմ ձայնը տալիս եմ ՆԺ-ին:
– Իսկ գլոբալ փոփոխություններ կա՞ն ձեր քաղաքական հայացքներում՝ ընդդիմությունից դեպի իշխանություն ուղղությամբ:
– Իմ քաղաքական հայացքները եղել են ու կան հակաիշխանական: Այսօր ասել, թե ես ընդդիմություն եմ՝ ճիշտ չի լինի, քանի որ ընդդիմություն բառը շատ է արժեզրկվել: Այդ բառի կողքին չի կարող լինել ածականներ, ասենք՝ կառուցողական ընդդիմություն, կոլորիտային ընդդիմություն, արմատական եւ այլն: Ածական դնել ընդդիմության այս կամ այն հատվածի վրա՝ նշանակում է մաս-մաս անել, բաժանել այն, մինչդեռ այս բաժանումը քաղաքական նպատակ է հետապնդում, ինչը համահունչ է վերեւների շահերին: Մենք որքան հետ ենք նայում ժամանակային առումով, տեսնում ենք, որ ընդդիմությունը միասնական է եղել, նրանց մեջ բաժանում չի եղել: Հայաստանում նաեւ չկար կենտրոն հասկացությունը, կար իշխանություն եւ ընդդիմություն: Աստիճանաբար իրավիճակն այնպես փոխվեց, որ ստեղծվեց մի դաշտ, որտեղ կարող էին հանգրվան գտնել մարդիկ թե՛ իշխանությունից, թե՛ ընդդիմությունից: Այս կենտրոն ասվածը ունի իր առավելությունները. իշխանության հաղթանակից հետո ոչինչ չես կորցնում, քանի որ հարաբերությունը նրա հետ վատ չէր: Եթե ընդդիմությունն է հաղթում, էլի ոչինչ չես կորցնում՝ նույն պատճառով: Բայց այս կենտրոնն ունի իր վատ կողմերը. կարող ես հայտնվել երկու կողմից մերժվածի վիճակում: Ժողովուրդը եթե գնում է ընդդիմության ետեւից՝ գնում է իշխանություն փոխելու ակնկալիքով: Իսկ եթե ընդդիմությունն ի զորու չէ դրան եւ իր համար լուծում է մի քանի մանդատի խնդիր, ապա խաբում է ժողովրդին: Կան ընդդիմադիր ուժեր, որոնք իշխանության դուստր ձեռնարկություններն են, ասենք՝ ՀՀԿ-ի, ԲՀԿ-ի եւ այլ իշխանական կուսակցությունների: Մի առիթով Քոչարյանն ասել է, որ եթե «Ա1+»-ը չլիներ, ես նրան կհորինեի, եւ դա շատ խորիմաստ միտք էր: Այսօր իշխանությունը ծնել է իրեն քննադատող ուժեր, որոնց բացակայության դեպքում այդ ուժերը կարող էին իրոք ծնվել եւ իրոք քննադատել: Դրանք հորինված ընդդիմադիրներ են: Իսկական ընդդիմադիրը ճանապարհի կեսից ետ չի դառնում: Չարաբաստիկ ապրիլի 13-ի գիշերը, մինչեւ վերջին պահը Բաղրամյան պողոտայում այդ ծեծուջարդի մեջ մնաց Ռաֆայել Ղազարյանի կինը, այն դեպքում, երբ որոշ տղամարդ լիդերներ դեպքից կես ժամ անց արդեն փախել էին: Ես այն ժամանակ նոր էի մտել հասարակական-քաղաքական կյանք եւ այդ կնոջ կերպարը իմ մեջ մնացել է որպես իսկական ընդդիմադիր լիդերի կերպար:
– Համակարծի՞ք եք, որ կան դասական ընդդիմադիրներ, առանց որոնց՝ քաղաքական դաշտը անհետաքրքիր կլինի:
– Ձեր խոսքը հավանաբար վերաբերում է, այսպես ասած՝ կոլորիտային ընդդիմադիրներին, որոնք խաղում են հենց իրենց այդ՝ կոլորիտային հատկանիշի վրա եւ համոզված են, որ խորհրդարանն առանց իրենց չի լինի: «Հարսնացու հյուսիսից» ֆիլմում մի այսպիսի արտահայտություն կա՝ բա Արտակը չի՞ հարցնի, թե Սերոբն ուր ա»: Պատասխանը լինում է՝ Արտակը գլուխը քարովը կտա: Իշխանությունը այս ձեր ասած դասական կոլորիտային ընդդիմադիրներին նույն բանն ասաց Ահարոն Ադիբեկյանի բերանով, որ եթե հանկարծ ժողովուրդը հարցնի, թե խորհրդարանում այսինչը կամ այնինչը ուր է, ապա ժողովուրդը գլուխը քարով կտա, Ահարոն Ադիբեկյանն արդեն ասել է, իսկ նրա կանխատեսումները իրականանում են: Այլ հարց է՝ նա կանխատեսում է եւ իշխանությունները իրականացնո՞ւմ են, թե՞ նա ուղղակի բարբառում է իշխանությունների սցենարը: Ես կարծում եմ, որ երկրորդ տարբերակն է գործում:
– Ինչպե՞ս եք համատեղել իրավապաշտպան հ/կ-ի գործունեությունը քաղաքականի հետ: Դրանք չե՞ն խանգարել իրար: Եթե ձեզ դիմեն իշխանական թեւի մարդիկ եւ խնդրեն պաշտպանել իրենց իրավունքները, ինչպե՞ս կվարվեք:
– Քանի որ ես իմ գործողությունների մեջ միշտ եղել եմ ազատ, ոչ ոք ինձ չի ասել՝ սա արա կամ մի արա: Ընդհակառակը, դրանք եղել են իրար փոխլրացրած: Ես մեծ սիրով կօգնեմ նաեւ իշխանություններին՝ իրենց «ոտնահարված» իրավունքները պաշտպանելու համար: Երբ ոտնահարվում է ընդդիմության իրավունքը, մենք դիմելու տեղ չունենք: Իսկ եթե նրանք մեզ դիմեն, մենք անպայման կօգնենք:
– Դուք եղել եք ՌՈ աշխատակից: Գաղտնիք չէ, որ մարդու իրավունքները հաճախ ոտնահարվում են հենց իրավական համակարգում: Եթե ձեզ դիմի մի քաղաքացի, որի իրավունքը ժամանակին դուք եք ոտնահարել, դա ձեզ չի՞ կաշկանդի:
– Համամիտ եմ, որ իրավական համակարգում շատ են ոտնահարվում մարդու իրավունքները: Ես ինքս տարբեր առիթներով հաճախ եմ տարվել ոստիկանության բաժանմունք եւ գիտեմ դա ինչ է: Կարծում եմ, որ պետք է ուրախ լինենք, որ այդ համակարգի մարդն է զբաղվում իրավապաշտպանությամբ: Ես վստահ կարող եմ ասել, որ աշխատելու ընթացքում ոչ ոքի իրավունքը չեմ խախտել եւ չեմ ոտնահարել, ուստի կաշկանդված լինելու խնդիր չունեմ:
