![\"\"](\"https://www.aravot.am/2007/aravot_arm/March/14/p7.jpg\")
Սրընթաց փոփոխվող քաղաքական իրողությունների համատեքստում դժվար չէր ենթադրելը, որ Վրաստան-Ռուսաստան հարաբերությունները, մեղմացման խիստ հարաբերական փուլ ապրելուց հետո, դարձյալ պետք է սրվեին:
Ինչպես հայտնի է, օրերս Կոդորի կիրճի որոշ հատվածներ ռմբահարվել են ռազմական ուղղաթիռների կողմից, որոնք, վրացական իշխանությունների պնդմամբ, ռուսական են եղել: Մինչդեռ պաշտոնական Մոսկվան չի հաստատել հիշյալ գործողություններին իր մասնակցությունը:
Երեկ հայտնի դարձավ, որ Վրաստանի արտգործնախարարությունը Կոդորի կիրճի իրադարձությունների առնչությամբ պաշտոնապես ՌԴ իշխանություններից պարզաբանումներ է պահանջել: Վրացական կողմի նախաձեռնությամբ հեռախոսազրույց է տեղի ունեցել Վրաստանի եւ Ռուսաստանի արտգործնախարարներ Գելա Բեժուաշվիլու եւ Սերգեյ Լավրովի միջեւ, որի ընթացքում վրաց արտգործնախարարը «ծայրահեղ վրդովմունք» է հայտնել նախորդ գիշեր Վերին Աբխազիայի գյուղերի օդային ռմբակոծության կապակցությամբ, եւ վրացական կողմի «կոշտ բողոքն է» փոխանցել ՌԴ իշխանություններին: Բեժուաշվիլին նաեւ հաղորդել է, որ, վրացական կողմի տվյալներով, ռմբակոծումն իրականացրած ուղղաթիռները «վրաց-ռուսական սահմանը հատել են հյուսիսից»: Վրաստանի ԱԳՆ հաղորդմամբ, արտգործնախարարները պայմանավորվել են հարցի քննարկմանը վերադառնալ միջադեպի վերաբերյալ Վրաստանում ՄԱԿ-ի դիտորդների առաքելության պաշտոնական եզրակացությունից հետո:
Իսկ երեկ Վրաստանում տեղի է ունեցել մի իրադարձություն, որն այլ կերպ, քան վերը նկարագրված զարգացումների օրգանական շարունակություն, դժվար է բնութագրել: Վրաստանի խորհրդարանն ընդունել է մի հռչակագիր, որում պաշտպանում է երկրի անդամակցությունը ՆԱՏՕ-ին: Փաստաթուղթն ընդունվել է 160 ձայնով. խորհրդարանականներից ոչ մեկը դեմ չի քվեարկել:
Ինչպես հաղորդում է «Կովկասպրես» գործակալությունը, հռչակագրի ընդունման միջոցով վրաց խորհրդարանականներն իրենց աջակցությունն են հայտնել նախօրեին երկրի առաջատար քաղաքական ուժերի ստորագրած նույնաբովանդակ հուշագրին:
Եվս մի իրադարձություն, որը Վրաստանի հետ ուղղակի առնչություն չունենալով՝ լավագույնս է ցուցանում եվրասիական տարածաշրջանում բաժանարար նոր գծերի առաջացման ու խորացման ողջ լրջությունը: «Ազատություն» ռ/կ-ի հաղորդմամբ, երեկ Ուկրաինա է ժամանել Պենտագոնի պատվիրակությունը՝ ԱՄՆ հակահրթիռային պաշտպանության գործակալության ղեկավար, գեներալ Հենրի Օբերինգի գլխավորությամբ: Ինչպես հաղորդել են Ուկրաինայում ԱՄՆ-ի դեսպանատնից, պատվիրակությունը քննարկելու է Եվրոպայում հակահրթիռային համակարգ ստեղծելու՝ ԱՄՆ նախաձեռնության հետ կապված հարցեր: Հատկանշական է, որ Ուկրաինայի նախագահը դրականորեն է տրամադրված Մոսկվայի ծայրահեղ զայրույթն առաջ բերած այդ ծրագրի նկատմամբ:
