![\"\"](\"https://www.aravot.am/2007/aravot_arm/March/6/p8.jpg\")
Հերթական օբյեկտը՝ բակի հաշվին
«Հերմինե Նաղդալյանը, իր սուպերմարքեթով չբավարարվելով, մեր շենքի բակային տարածքի հաշվին ուզում է նոր օբյեկտ կառուցել, արդեն գեոդեզիայի ինստիտուտից մասնագետներ են եկել եւ տարածքում չափագրումներ կատարել, թե կոնկրետ ինչ են սարքելու՝ խանութ, ռեստորան, թե բար՝ չեն ասում: Շաբաթ օրն էլ մի խումբ տղամարդիկ եկան, տարածքն ուսումնասիրեցին, երբ հարցուփորձ արինք, թե ի՞նչ են ուզում բակում կառուցել, պատասխանեցին՝ կկառուցենք՝ կիմանաք»,- «Առավոտին» այսպիսի բողոքով են դիմել Դավիթաշենի 4-րդ թաղամասի 27 շենքի բնակիչները: Նրանցից մեկի՝ Ջավահիր Այվազյանի ներկայացմամբ՝ «Ես առաջին հարկում եմ բնակվում, ուղիղ պատուհանիս տակ քանի օր է՝ չափումներ են անում: Այստեղ ինչ էլ կառուցեն՝ ինձ խանգարելու է, փակելու է պատուհանից եկող լույսը, բացի այդ, աղմուկ-աղաղակ են անելու: Ես վատառողջ կին եմ, ինչ օբյեկտ էլ կառուցեն՝ հանգիստ չեն տալու»:
Շենքի բնակիչները տեղեկացել են, որ այդ տարածքում շինարարություն իրականացնողը «Հ. Ն.» սուպերմարքեթի տերն է, իսկ սուպերմարքեթը պատկանում է Ազգային ժողովի պատգամավոր Հերմինե Նաղդալյանին (Հ. Ն. հապավումը հենց այդպես էլ վերծանվում է):
Այս առնչությամբ երեկ Հերմինե Նաղդալյանից չհաջողվեց պարզաբանումներ վերցնել, քանի որ նրա հեռախոսը չէր պատասխանում:
