![\"\"](\"https://www.aravot.am/2007/aravot_arm/February/1/p4.jpg\")
Վերջինս, սակայն, խուսափում է դատարան ներկայանալ
Երեկ Կենտրոն եւ Նորք-Մարաշ համայնքների առաջին ատյանի դատարանում, դատավոր Մնացական Մարտիրոսյանի նախագահությամբ, շարունակվեց քննվել ռեժիսոր Արմեն Մազմանյանի դեմ հարուցված քրեական գործը: Տուժողը «ԱԼՄ» հոլդինգի նախագահ Տիգրան Կարապետյանն է, որի երկրպագուները այս անգամ էլ գրավել էին դատարանի դահլիճը: Ներկա էին նաեւ Արմեն Մազմանյանի ուսանողները:
Հիշեցնենք, որ Տ. Կարապետյանը ռեժիսորին մեղադրում էր «ԱրմենԱկոբ» հեռուստաընկերության «Խոսք առանց փողկապի» հաղորդման ժամանակ արած հայտարարություններով իր անձն ու արժանապատվությունը վիրավորելու մեջ:
Երեկվա նիստում շարունակվեց ապացույցների ուսումնասիրությունը եւ ցուցադրվեց այն տեսաժապավենը, ուր Ա. Մազմանյանը Տ. Կարապետյանին որակում է «մանկապիղծ», «ջեբկիր» ու «դատված»: Դատարանը հրապարակեց նաեւ քրեական գործ հարուցելու մասին դատախազության քննիչ Արամ Գրիգորյանի որոշումը: Ա. Մազմանյանի պաշտպան Հայկ Ալումյանը կրկին հիշեցրեց, որ դատախազության քննիչ Ա. Գրիգորյանը իրականացրել է նույն գործով ե՛ւ նախաքննությունը, ե՛ւ հետաքննությունը: Այսինքն, ըստ փաստաբանի, վերջինս կատարել է մի շարք դատավարական գործողություններ, որոնց իրավունքը չուներ. «Տվյալ քրեական գործում Արամ Գրիգորյանը պատշաճ քննիչ չի եղել, հետեւաբար նրա կողմից ձեռք բերված բոլոր ապացույցները անթույլատրելի պետք է ճանաչվեն… Այդ նյութերը չեն կարող դրվել մեղադրանքի հիմքում»:
Նախագահողը իրեղեն ապացույց համարեց ՀՀ ոստիկանության տեղեկատվական կենտրոնի այն գրությունը, ըստ որի՝ հարցում է կատարվել ՌԴ համապատասխան մարմիններին եւ վերջիններս փոխանցել են, թե Տ. Կարապետյանը ՌԴ-ում երբեւէ դատված չի եղել: «Եթե ՀՀ ոստիկանության ինֆորմացիոն կենտրոնն իր այդ տեղեկանքը կազմել է ՌԴ համապատասխան իրավասու մարմնի կողմից տրամադրված պաշտոնական գրության հիման վրա, ապա վերջինս պետք է կցված լիներ ՀՀ ոստիկանության ինֆորմացիոն կենտրոնի տրամադրած տեղեկանքին: Սակայն ՌԴ ոստիկանության տրամադրած համապատասխան գրությունը բացակայում է: Նաեւ նշում չկա այն մասին, թե ի՞նչ աղբյուրներից է ստացվել այդ տեղեկությունը: Փաստորեն, դրանք անհայտ աղբյուրից ստացված տեղեկություններ են»,- հայտարարեց Հ. Ալումյանը: Ա. Մազմանյանը ՌԴ- ոստիկանության կողմից տրամադրված ինֆորմացիան, թե Տ. Կարապետյանը դատված չէ, բավարար չհամարեց եւ պահանջեց, որ ուսումնասիրվեն ԽՍՀՄ-ի այդ ոլորտի արխիվները:
Նա հրաժարվեց ցուցմունք տալ, ասելով, որ իրենք Վոլգոգրադից Կարապետիչի մասին նոր տեղեկությունների են սպասում: Ռեժիսորը պահանջեց, որ դատական նիստերին ներկա լինի նաեւ տուժողը:
Ա. Մազմանյանը ներկայացրեց բազմաթիվ ուղղագրական ու կետադրական սխալներով գործին վերաբերող մի փաստաթուղթ, որի հեղինակն էր Տ. Կարապետյանը: Այնտեղ, օրինակ, «բացատրություն» բառը գրված էր «բացատրուցյուն», «կազմածից»-ը «կազմածիծ», «կարդալը»՝ «կարթալ», իսկ «ճիշտ է»-ն «ճիշտե»: Տ. Կարապետյանի ներկայացուցիչ Էդվարդ Չինարյանին սա դուր չեկավ: «Այս ամենը շոուի վերածվելու միտում ունի, պետք չէ ընթացք տալ»,- ասաց Կարապետիչի ներկայացուցիչը:
Դատական հաջորդ նիստը նշանակվեց փետրվարի 5-ին:
