![\"\"](\"https://www.aravot.am/2007/aravot_arm/January/9/p1-2.jpg\")
Բանաստեղծուհի եւ նկարչուհի Սվետլանա Հակոբյանին կմեծարեն
Հունվարի 11-ին Ալ. Սպենդիարյանի անվան օպերայի եւ բալետի պետական ակադեմիական թատրոնում,15-ամյա ընդմիջումից հետո (վերջին տարիներին օպերայի բեմը «զավթել» են շոու բիզնեսի տեղական եւ արտասահմանյան ներկայացուցիչները), սպասվում է դասական արվեստի երեկո: Այդ օրը բեմ կբարձրանան միջնադարյան տաղերի, շարականների անզուգական մեկնաբան, երգիչ Կարո Չալիկյանը, «Կադանս» անսամբլը, կոմպոզիտոր Ռոբերտ Ամիրխանյանը, օպերային երգչուհի Մարինե Դեինյանը, Սանկտ Պետերբուրգի բալետի պետական ակադեմիական թատրոնի արտիստներ Յուրի Անանյանը, Ելենա Կուզմինան, կոնտր տենոր Մարտին Օրոն: Օպերային թատրոնի նվագախումբը կղեկավարի անվանի դիրիժոր Ֆագունդո Ագուդինը, ով արդեն 2 տարի օպերային թատրոնի հետ համագործակցության ծրագրեր է իրականացնում:
«Աղոթազանգեր» խորագրով երեկոն նվիրվում է բանաստեղծուհի, նկարչուհի, բազմաշնորհ արվեստագետ եւ հասարակական գործիչ Սվետլանա Հակոբյանին, ով այդ օրն առաջին անգամ Օպերային թատրոնի ճեմասրահում կներկայանա իր գեղանկարչական աշխատանքներով: Ս. Հակոբյանը արտերկրի ընթերցասեր հասարակայնությանը հայտնի է «Վերածնունդ», «77 վարդ» եւ «Ցանկության ծառը» բանաստեղծությունների ժողովածուներով, «Ժաննա դ\’” Արկ» պոեմով եւ այլ երկերով:
«Դար» բարեգործական հիմնադրամի տնօրեն, բանաստեղծ Սուրեն Գրիգորին խնդրեցինք ներկայացնել տիկին Հակոբյանին, քանի որ նրա անունը հայտնի է հիմնականում արվեստագետների նեղ շրջանում: Պրն Գրիգորը հայտնեց, որ արդեն 5-րդ տարին է, ինչ գործում է տիկին Հակոբյանի ղեկավարած «Կենաց խոսք» հասարակական կազմակերպությունը, որի նպատակն է Հայաստան-Սփյուռք մշակութային համագործակցության ամրապնդումը: «Սվետլանա Հակոբյանի գործունեությունը հիմնականում ուղղված է դեպի Արցախ աշխարհ, ավելի կոնկրետ՝ Քելբաջար, որտեղ կրթամշակութային ծրագրեր ունենք իրականացնելու՝ «Պետրոս Ղեւոնդյան» դպրոցում, «Վիգեն Զաքարյան» մանկապարտեզում եւ այլուր: «Կենաց խոսքի» ծրագրերի իրականացման համար ստեղծվել է «Դար» տարածաշրջանային զարգացման եւ մրցունակության հիմնադրամը»,- հայտնեց մեր զրուցակիցը: Ս. Գրիգորը նշեց նաեւ, որ տիկին Հակոբյանը տարիներ շարունակ օգնում է արցախցի ընտանիքներին. «Մինչ այսօր Ղարաբաղից տարբեր պատճառներով ընտանիքներ են հանգրվանում Սվետայի չարենցավանյան բնակարանում»:
«Օրերս Մոսկվայում Ալլա Տեր-Հակոբյանի թարգմանությամբ լույս է տեսել «Հայաստանի ռիթմերը եւ հանգերը» պոետական անթոլոգիան, որում, ի թիվս հայաստանցի ճանաչված բանաստեղծների, ընդգրկված են նաեւ Սվետլանա Հակոբյանի բանաստեղծություններն ու «Ժաննա դ\’ Արկ» պոեմը»,- տեղեկացրեց պրն Գրիգորը:
