![\"\"](\"https://www.aravot.am/2006/aravot_arm/December/15/p239-1.jpg\")
2006 թվականին «Սոգլասիե» ՓԲԸ նախագահ, Համաշխարհային հայկական կոնգրեսի նախագահ Արա Աբրահամյանի նախաձեռնությամբ ստեղծվեց «Ավիացիոն-տիեզերական արտադրական համակարգեր» միացյալ կոնստրուկտորական բյուրո» միջազգային ստրատեգիական կոնսորցիումը: Ինչպես տեղեկացնում է «Նոյյան տապանը», կոնսորցիումի նպատակն է վերսկսել գիտա-տեխնիկական այն գործը, որ ժամանակին կատարվել էր «Էներգիա Բուրան», այդ թվում «Մրիա» ԱՆ-225 գերծանր կրող-ինքնաթիռի ծրագրով, ըստ որի՝ «Մրիան» կոչված էր փոխարինել ավանդական տիեզերանավերը: Գաղափարները, որոնց մի մասը ծրագրվում է իրականացնել կոնսորցիումին առաջադրված խնդիրները լուծելիս, առաջին անգամ Արա Աբրահամյանն արտահայտել է իր «21-րդ դարի տիեզերական ոդիսական: Փրկության ուղի» էսսե-վիպակում, որի հայտահանդեսը կկայանա Փարիզում միջազգային խոշորագույն լեզվաբանական «Էքսպոլանգ-2007» ցուցահանդեսում՝ 2007 թվականի հունվարին: Հիշեցնենք, 20-րդ դարում կար եւս մի գործիչ, որն իրեն անգերազանցելի մասնագետ էր համարում բոլոր գիտություններում, այդ թվում՝ աստղագիտության եւ լեզվաբանության մեջ: Բայց ի տարբերություն հայ մեծահարուստի, այդ հայտնի գործիչը կիսատ-պռատ կրթություն էր ստացել ճեմարանում:
