![\"\"](\"https://www.aravot.am/2006/aravot_arm/December/14/p238-3.jpg\")
Երեկ ասաց ԱԺ փոխնախագահ, ՀՅԴ Բյուրոյի անդամ Վահան Հովհաննիսյանը
Զրույց ուսանողների հետ
Երեկ ուսանողների հետ հանդիպման ընթացքում Վահան Հովհաննիսյանը բացահայտեց, թե ինչու ՀՅԴ-ն՝ լինելով ձախ կուսակցություն, հաճախ կողմ է քվեարկում ազատական օրենքների. «Ունենալով դարից ավելի փորձ՝ մենք գիտենք, որ սոցիալիզմն աղքատ երկրում անմիջապես բերում է բոլշեւիզմի. սա անթույլատրելի է։ Եվ եթե դու ունես եւ ուզում ես իրականացնել սոցիալական ծրագրեր՝ պիտի առաջին հերթին հարստացնես երկիրդ, բյուջեդ։ Իսկ բյուջեն հարստանում է աշխատանքով. ուրեմն պետք է կարողանաս լիբերալ օրենքներով երկիրդ գրավիչ դարձնել ներդրողների համար, իսկ տեղական արտադրողների համար՝ գրավիչ դարձնես Հայաստանում աշխատելը, որ կապիտալը չհոսի դուրս»: Նաեւ նշեց, թե քանի որ մեր ժողովուրդը ջղային է. «Իրավունք ունի ջղային ու նյարդայնացած լինել իր իշխանություններից եւ շատ լուրջ պահանջներ ունի». աջերն էլ՝ հանձինս ՀՀԿ-ի եւ ՄԱԿ-ի, հաճախ պարտադրված են լինում կողմ քվեարկել սոցիալական ուղղվածություն ունեցող օրենքներին:
Որպես աջերի եւ ձախերի դասական բաժանման Հայաստանում բացակայության՝ մեկ այլ պատճառ նշեց՝ ԼՂ հիմնահարցը. «Քանի դեռ մենք չենք հաստատել վերջնական խաղաղություն մեր տարածաշրջանում, քանի դեռ այստեղ հայ էթնոսի դերն ամրագրված չէ պայմանագրերով, այլ միայն ուժի եւ հաղթանակի վրա է հիմնված՝ մենք չենք կարող թույլ տալ երկրի ներսում որեւէ ապակայունացում։ Ահա թե ինչու է ՀՅԴ-ն մաս կազմում կառավարող կոալիցիային»։ Վահան Հովհաննիսյանը խոստովանեց, որ «շատ ու շատ հարցեր կան, որոնց կապակցությամբ ՀՅԴ-ն անհամաձայնություն ունի իշխանություն կազմող այլ քաղաքական ուժերի հետ»: Սակայն հաշվի առնելով երկրի առաջնահերթությունները՝ արտաքին սպառնալիքից երկրի անվտանգությունը եւ «որպես դրա շարունակություն՝ երկրի ներքին կայունությունը», շատ հաճախ «ինչ-որ բանի վրա էլ աչք ես փակում, ինչ-որ բան տեսնում ես, բայց չես քննարկում թերթերի էջերում, այլ փորձում ես ուրիշ ճանապարհներով լուծել»:
Ուսանողներն այս ամենի կապակցությամբ որեւէ հարց չուղղեցին ԱԺ փոխնախագահին: Հնչած միակ հարցը վերաբերում էր նրան, թե ինչպե՞ս կարելի է արմատախիլ անել Լենինի պաշտամունքը: Վահան Հովհաննիսյանը նշեց, թե նման պաշտամունք կա ՌԴ-ում, ուր չեն կարողանում Լենինի դիակը «Մավզոլեից դուրս շպրտել: Ազգովին գերի են ընկել մումիային»: Նաեւ նշեց. «Իլյիչը տականք էր, մարդասպան ու ամենադաժան դահիճը: Կարծում եմ, որ Ադոլֆ Հիտլերը միակն է 20-րդ դարում, որ կարող է համեմատվել Լենինի հետ»:
Զրույց լրագրողների հետ
Ավելի ուշ լրագրողները հետաքրքրվեցին, որ եթե ՀՅԴ համար այդչափ կարեւոր է երկրի ներքին կայունությունը՝ ինչո՞ւ էր պատերազմի տարիներին իշխանությունների դեմ ցույցեր անում: «Դա բոլորովին այլ էպոխա էր, եւ իշխանությունը, պետականությունը դեռ ամուր չէր Հայաստանում,- պատասխանեց Վահան Հովհաննիսյանը:- Մենք պետականությանը ձեռք չենք տվել: Եթե մենք ցույցեր չանեինք՝ պատերազմում չէինք հաղթի»:
Պատասխանելով «Քաղաքացիական անհնազանդություն» շարժմանը վերաբերող հարցին՝ ՀՅԴ Բյուրոյի անդամն էլի նշեց. «Երկրի ներքին կայունությունն առաջնահերթություն է մեր ժողովրդի համար: Դրա համար անհնազանդություն կարելի է արտահայտել միայն այն դեպքում, եթե իշխանությունների գործողություններն ակնհայտորեն վնասում են ազգային եւ պետական շահերին: Այդպիսի ակնհայտ վնաս, սպառնալիք ես չեմ տեսնում: Իրենք երեւի տեսնում են: Դե, եթե տեսնում են՝ թող չհնազանդվեն»:
Բնական էր, որ անդրադարձ եղավ Ժիրայր Սեֆիլյանի գործին: Վահան Հովհաննիսյանը չհամաձայնեց, թե նրա կալանավորումն առնչվում է ազատագրված տարածքների հավանական վերադարձին. «Ես չեմ կարծում, որ Հայաստանում երբեւէ ձերբակալեն որեւէ մեկին, որը դեմ է ադրբեջանցիներին տարածք հանձնելուն: Ուրեմն՝ պիտի ինձնից սկսեն»: Հետեւած հարցին, որ եթե դեմ է տարածքները հանձնելուն՝ հնարավո՞ր է միանա Ժիրայր Սեֆիլյանին եւ նրա համախոհներին, ԱԺ փոխնախագահը պատասխանեց. «Ես չեմ տեսել որեւէ մեկին, որ ընդհանրապես պատրաստվում է ինչ-որ բան հանձնել: Դրա համար այդ մասին խոսելը վաղաժամ է»:
«Երկիրը բավականին փոխվել է, եւ այսօր ցնցումային շարժումներով բարեփոխումներն առաջ տանել հնարավոր չէ: Դա պահանջում է երկարատեւ աշխատանք: Մենք շատ ավելի լավ ճանաչեցինք մեր ժողովրդին եւ հասկանում ենք, որ էվոլյուցիոն զարգացման՝ բարեփոխումների ճանապարհը շատ ավելի արդյունավետ է»,- նրա այս դիտարկմանը հետեւած հարցին՝ հնարավո՞ր է հանեն հեղափոխական բառը ՀՅԴ անվան միջից, Վահան Հովհաննիսյանը պատասխանեց. «Ոչ, իհարկե, որովհետեւ մեր հեղափոխությունը չի վերաբերում Հայաստանի ներսին»:
