![\"\"](\"https://www.aravot.am/2006/aravot_arm/November/14/p216-2.jpg\")
Երեկ բացվեց Թաթուլ Հակոբյանի «Ուրբաթ» ակումբը, որի առաջին հյուրը ՀԺԿ նախագահ Ստեփան Դեմիրճյանն էր, թեման՝ 2007-ի խորհրդարանական ընտրությունները: Ստեփան Դեմիրճյանը պատասխանեց լրագրողների հարցերին:
– «Հայրենիք եւ պատիվ» կուսակցության ղեկավար Գառնիկ Մարգարյանը վերջերս «Իրավունք» թերթում հայտարարեց, որ այն ընդդիմադիրները, ովքեր կմասնակցեն հերթական ընտրություններին, կնշանակի՝ մանդատը արդեն գնել են իշխանություններից: Եթե դուք գնում եք հերթական ընտրությունների, ուրեմն գործարքի մե՞ջ եք իշխանությունների հետ: («Հայոց աշխարհ»)
– Բնականաբար՝ ոչ, ես նաեւ դա նկատի ունեի. եթե մենք մասնակցում ենք հերթական ընտրությունների, դա իհարկե չի նշանակում, որ ինչ-որ գործարք կա, ամոթ է դրա մասին խոսելը, բայց ես նաեւ հասկանում եմ «Հայրենիք եւ պատիվ» կուսակցությանը եւ կիսում եմ այն տեսակետը, որ իհարկե, եթե հնարավոր է մինչեւ հերթական ընտրություններ փոխել իրավիճակը, ավելի լավ:
– Դուք շարունակ ետ եք նայում եւ հիշում եք անցած ընտրությունները, մինչդեռ այդ նույն ժամանակահատվածում իշխանական ուժերը բավականին ակտիվորեն աշխատում են, նախընտրական քարոզարշավն իրենք արդեն սկսել են եւ փորձում են այս ընթացքում շահել ժողովրդի վստահությունն ու սերը: Դուք կոնկրետ ի՞նչ եք անում այդ սերը եւ վստահությունը ստանալու համար, բացի անցյալը հիշելուց: («Առավոտ»)
– Ես համաձայն չեմ, որ մենք զբաղված ենք նրանով որ միայն անցյալն ենք հիշում, բացի դրանից, անցյալը մոռանալ պետք էլ չէ: Մենք նայում ենք առաջ եւ մասնակցելու ենք հաղթելու նպատակով, իսկ անցածից պետք է հետեւություններ անել, բնականաբար, մենք նաեւ սթափ ենք վերլուծում մեր քայլերը, ինքնաքննադատաբար ենք մոտենում մեր անցած ուղուն, համապատասխան հետեւություններ ենք անում եւ կփորձենք նույնը անել ավելի արդյունավետ եւ ավելի լավ: Բայց անցյալը մոռանալ չի կարելի, ամեն ինչ փոխկապակցված է: Ինչո՞ւ մարդիկ չեն հավատում ընտրություններին, որովհետեւ մինչեւ հիմա կեղծվել են, որովհետեւ մինչեւ հիմա որեւէ մեկը պատասխանատվության չի ենթարկվել: Կարծում եմ, կհամաձայնեք. եթե մի կեղծարար պատասխանատվության ենթարկվեր, դրա ազդեցությունը շատ ավելի կլիներ, քան «ԸՕ»-ի փոփոխությունները:
– Գուցե մի քիչ կոռեկտ չհնչի, բայց ուզում եմ այս հարցը տալ: Ձեր հայրը, փաստորեն, հանուն Հայաստանի ապագայի ժամանակին համագործակցեց իշխանության մի թեւի հետ: Կա՞ այդպիսի մի գաղափար կամ՝ ի՞նչ գաղափար կարող է լինել, որ, օրինակ, ձեզ եւ Սերժ Սարգսյանին կարող է համախմբել: Հանուն երկրի պայծառ ապագայի հնարավո՞ր չէ համախմբումը իշխանության մի թեւի հետ: (Թաթուլ Հակոբյան)
– Հանուն երկրի պայծառ ապագայի ճիշտ կլինի, որ այս իշխանությունները հեռանան:
